Read Ninia Yali MAZMUR 12 Bible Online

MAZMUR 12 - Ninia Yali bible

MAZMUR 12

¹Ap homi en suni wilibi folug enebe seberoho urukmu melal-enepuk on fahet, suni ligin on anyo fene felaleg on, at Daud asuni anyo.

²Ap Hat hobam dipdoho neg duruk on etmano mundoho eleg ahesama, ap fano on eke wereg fug en de, TUHAN nenakni Haren nit let-nenebin.

³Iren de enori nim lal-lal aheg, enambilik buhun fam de enori enele seiale hweag-eseheg, neg duruk.

⁴TUHAN nenakni, iren ap enda wakoho enandindil buhun on ai bale fesein; enambilik ele hum atlug uruk enap ai Haren enambilik lare fesein.

⁵Iren uruk kwit de, “Nit nenambilik anggen aire nit nenonggwareg en neg hwalukwag ulug wereg ma re, niren di ale su ale mundoho uruk kahe hale deg ma re, di on su on en ulug eke kwe bal-nenebuk fug alereg!” ulug uruk enap etma.

⁶At TUHAN en uruk kwit de, “Ap homi enenggik eleg on anggin fanggindoho debeseheg, ap homi anggolo fanggoloroho wereg on nim wene baleheg, durukmu re, it nenobam fanoroho neg welala aho, ulug boruk on ai an den airoho debesehuk ulug, ketia An waharuk kahi.” Isi.

⁷At TUHAN en sali wat-nesauk on aire mun omamne deg lit, no perak indok han weratlug siag on embeseruk kwit ebe on neg wauk anyo hag deg ma re, niren ai fam nenenda dipdeg lit welamuhuk fano.

⁸Ap siag duruk on de it neg humdoho di kwe su kwe mundoho saha uruk; ap homi enebe domog en de siag on duruk ale anyo fahet de motdoho lahabe foruk. Famen de nenakni TUHAN, nit de we Haren neg nenalong bal-nenusug lahenma re, ap homi siag duruk on ai en nit siaho nenobahauk no Haren kahal-nenusug lamin.