Read Ninia Yali MAZMUR 135 Bible Online

MAZMUR 135 - Ninia Yali bible

MAZMUR 135

¹TUHAN mot-diek! Hit At amingming angge on en, TUHAN unuk neg mot-diek

²At TUHAN Obam wirigmu kabog-dik kuruk kahep on, At Allah nit nenakni ai wereg ma etma.

³At ebe fano on deg ma, TUHAN mot-diek, At endaleg[70] on deg ma, At unuk neg mot-diek.

⁴Aren At onggwareg fahet Yakub momal-debag, It omaliki Israel on de onggwareg angge on dobahat debag.

⁵An noluk deg angge re TUHAN aire mundoho humon, At de dewa etma sebeleg kweleg mun leho on wereg.

⁶O bohol fam inim kwenang fam inim, ik laut ahummu nim ik ahum doalegma etma nim, Aren de amu enda ahayeg boruk aleroho neg duruk.

⁷Kwenang ambiangma etman Aren hena mondorik waharuk, Aren neg osit fahet oweal deberuk. Airoho debelug, hol Aren forohoma etmano en, wilibik wamag ulug miming-duruk.

⁸O Mesir fam etma re Aren ap enomalik et wam on enomalik et, wandeba on mundoho binggi enowatfag.

⁹At raja mel austi pegawai mel unggum og-esamin ulug, o etma Aren along on mel, eneg ale mel mun humdoho duruk katfag.

¹⁰Aren de ap homi di enunggul unuk su enunggul unuk humdoho elehap debeseruk kwit de, ap raja mun enalong enap etmano binggi enowatfag on de:

¹¹Hun Sihon raja Amori on mel Og raja Basan on mel, it raja o Kanaan fam welatfag on mel etma.

¹²Airoho debelug de it enanggwenang anyo, it omaliki Israel on enangge on amag ulug og-esebag.

¹³TUHAN nakni, Hat hobahet de hweag-esauk kwit neg welamuhup, Hat hunuk de it fobik endag-ail lauk kamuhup etman oho ebereg lit neg welamuhup,

¹⁴Haren de it homaliki enobahet mun dipdoho neg duruk kahen ai fam, it hamingming angge etma henda hundig-enepuk kahen ai fam.

¹⁵ It enanggembu re ap enenggik en emas mel perak mel fam hilinggig angge.

¹⁶It enembilik hilinggig famen de, enele uk fug alereg, inil wereg famen de kumu ha alereg.

¹⁷Enesanggo wereg famen de holduk fug, enambilik fam en de enele ahe wilipuk fug.

¹⁸Airoho neg it ap hilingguruk on mel, ne obam dip-deberuk on mel atuk kamuhup.

¹⁹Yaho hit ap homi Israel on, TUHAN mot-diek, hit imam Allah en on etman At neg mot-diek.

²⁰Hit ap Lewi henap, TUHAN mot-diek, Hit At fam henakol boruk kahep on en At neg mot-diek.

²¹O Sion fam, o Yerusalem At ebe wereg ma, etman At neg mot-diek. TUHAN mot-diek!