Read Ninia Yali MAZMUR 138 Bible Online

MAZMUR 138 - Ninia Yali bible

MAZMUR 138

¹Daud en ebag on. TUHAN nakni, an de nenda mundoho abirangge fam Hat dang-hapuk katmin. It kembu dewa enolohotma etman, An de Hat hobahet suni motdeg suni uruk katmin.

²Haren de dipdoho neg duruk kwit henda hundig-nenusug lahen ale ai fahet an den Hat hunuk mot-hapuk kwit, Hat hobam mun amu eneg on fil etma nelenggen dimi-debelug mot-hapuk kahi. Haren de ap homi en Hat hebe fahet uruk on sebeleg hag debelug, Haren sali waroho irihin on fahet neg de leho hag boruk kahen.

³An den Hat hobam hwi-hapukmu re, Haren hele onggo hweag-nutuk kahen, An nambong se on amag ulug Haren nenda omamneap nobahain.

⁴TUHAN nakni, Haren wene sali irihin ale it mundoho enesanggo holswa ma it raja kwenang fam suma wereg on abirangge en Hat mot-habuhup.

⁵Iren de Haren dirihin ale fahet suni eheg, Hat hebe along leho on welahen ale fahet suni eheg duhup.

⁶Hun hebe mun leho humon welahen, famen de it mun sebeleg on de Haren fubi debeseruk kahen neg; ap winik-wonog uruk on de Hat holohotman herag am fug alereg.

⁷An nobam anggin on enam aik waharukmu, Haren neg an nebe bugdoho fahat-nusug lahen. It naselei on enolok hasimeg ale nobaharukmu re, Hat homamne fam neg an nahap wendare-nobaharuk kahen.

⁸Haren an nobam sali wat-nitihin on anyo higitdoho dip-deberuk karuhun; it homaliki enobahet duruk ale bale fouk fug.