Read Ninia Yali MAZMUR 139 Bible Online

MAZMUR 139 - Ninia Yali bible

MAZMUR 139

¹Ap homi en suni wilibi folug enebe ambine urukmu melal-enepuk on fahet, At Daud asuni. TUHAN nakni, Haren de an nebe mun holuk deg lit fik-fu nobaharuk kahen.

²An den di duruk su duruk, duruk kahi on etma Hat mundoho holuk deg; Hebe yatman an den wenggulduk kahi ale mun holuk.

³Haren de an yabuk duruk kweleg inim, kel wat-dauk kweleg inim hil-neauk kahen, an den duruk kahi ale etma Hat mundoho holuk deg.

⁴An nele owan maruk eleg kweleg famen oho re, ele di on imisi ulug Hat mundoho holuk deg.

⁵Haren de an nebe nalukwe nambol, nombandu foma-foma fil en inim maseroho fahat-nusug lahen, ne Hat homamne fam de an nalong baloho fahat-nusug lahen.

⁶Hat holuk deg ale aire mun koruele yaron hag deg ma, an den wenggel hihi ha man de wenggeloho la fug alereg.

⁷Hat Homamne ai famen an lil atmin ulug kema lahi ha alereg? Hat holohotma etman embeselug lamin ulug kema longgo ik lahi ha alereg?

⁸An bohol fam lahaki ha man de etma Hat wereg ma neg, ap homi waratlug laukmu etma lalug nohoruk men oho etma Hat wereg ma neg.

⁹An nebe daroho mo indip lahaik waharukmu etma dahandoho lahi ha man oho, ite mo obuk uruk fil mun yit-yatma etma lalug bok aik lahi ha man oho,

¹⁰etman Haren an let-napuk kahen; o etman Hat henggik en an melal-napuk kahen.

¹¹An den heng uruk kwit mum en sal-nabik wamag ihi ha man oho, an naluluk kwe seleg wereg on oho hup aman,

¹²ohore mum atuk on ai hat fahet heik deg lam fug alereg; hup deg on aire o nukoho seleg deg eta hag deg lam alereg, ne mum aire seleg hag deg lam alereg.

¹³An nebe fam di on su on etma Haren neg waldoho nobaharihin, ne nisinga ahummu Haren ilitdoho nobaharihin.

¹⁴Hat de mun nik aleroho deg lahen ai fam Hat mot-hapuk kahi! Haren duruk kahen ale etma re mun along ale neg deg ma nobam fog napuk, ai fahet an den dik-demdoho fubi deberuk kahi.

¹⁵An nowag ilit duruk li em, an nisinga ahummu etma mun bukiroho hundutuk kweleg, ne an etma ling-longdoho hum atuk kweleg, Hat hilmu an heraho latihik fug.

¹⁶An nisinga ahummu wereg kweleg Hat hil neauk katihin; abirangge etma Hat ham buku fam mundoho baleg latsi, dem misig oho owan eke am fug kweleg nukoho atuk li anyo mundoho eneg welatsi.

¹⁷Nakni Allah, Haren wenggelduk kahen ale etma, an mundoho sug-sag[71] napuk, ne ebe oho re mun hum-hamdoho deg!

¹⁸An den wenahakiha man oho re iliangge etma deg kweleg mun along deglam alereg; an noluk in atlug halug oho re, Hat hobahet de nin wenggelduk neg kahi.

¹⁹Nakni Allah, ap homi enolok on etma re Haren mun enowaroho feseiyug, it ap amep belapni etma an horogman yarap-debeseiyug!

²⁰Hat hobahet iren mun siag ale neg uruk, O Hat hobam kota etma fahet enele seiale fam hombuk balduk.

²¹TUHAN nakni, ap homi Hat enerim hapuk etma fahet an den nerim-enepuk kahi, ap homi Hat il haplug duruk on etma fahet nendama mun het napuk!

²²It ai enobahet de an mun nerim-enusug lahi, ne it fahet de mun naselei on boruk kahi.

²³Nakni Allah, Haren an fubi-neakin, an nendama erahamu kumu neakin, an nabut bal-nealug wenggelduk kahi ale holuk amin.

²⁴An nebe fam kwasik on oho wereg ale aire Haren hil neakin, ne kobokwe mundoho-mundoho[72] on fam melal-naplug lauk kamin.