Read Ninia Yali MAZMUR 14 Bible Online

MAZMUR 14 - Ninia Yali bible

MAZMUR 14

¹ Ap homi en suni wilibi folug enebe seberoho urukmu melal-enepuk on fahet, Daud asuni anyo. Ap sohou on en enendama boruk kwit de, “Allah wereg fug” boruk. Airoho boruk kwit de iren enobabut duruk ale re mun siag on mel, me nape ale hag on omano mel neg duruk. Ne iren fano ale on eke duruk fug.

²At TUHAN ebe boholma wereg lit ap homi mundoho enobam il fu esalug de, ap homi enenda wereg on An napne wauk on wereg a, eleg a? ulug hera-enepuk.

³Famen de ap homi enebe mundoho re At embeselug wilibik lauk kwit dahandoho neg deheg, enobabut mundoho nong-hong eheg disi, ap misig en ulug oho fano ale duruk on eke wereg fug.

⁴At TUHAN en uruk kwit de, “Ap siag neg duruk on etma re enape enggat atuk eleg a? Iren An nomaliki enangge del-dauk kweleg, An nobam somban uk eleg angge wereg etma hwi.”

⁵It ap homi At Allah ele holoho neg duruk on de Aren it enalong bal-enusugmu re, it ap homi siag neg duruk on de mundoho enakol neg amuhup.

⁶It ap homi siag neg duruk on en de ap homi enenggik eleg on etmano kwe baloho fesoul ulug duruk, famen de At TUHAN en it fahet enalong bal-enepuk.

⁷At TUHAN en de omaliki enebe fam deg ale au mundoho hwale fesehu halug de, it Yakub en ondoho on enambiangma on au mundoho enahayeg duruk kamuhup. We o Sion fam etman neg, it ap homi Israel on enahap wendar-enebik waharuk kamag!