Read Ninia Yali MAZMUR 140 Bible Online

MAZMUR 140 - Ninia Yali bible

MAZMUR 140

¹Ap homi en suni wilibi folug enebe ambine urukmu melal-enepuk on fahet, At Daud asuni.

²TUHAN nakni, ap enolok on etma fam en an koloe-nobahain, an nebe it ap homi enobabut hape fam duruk on etma fam en hwaloho fahat-nusug lamin.

³It enendama de enolok wene melalduk, nukoho hundig-hundig etma fam iren yeik-suahal ale neg lahapuk.

⁴ It enambilik anggen de kisu senggel-enepuk on aeg kamol hag deg, it enele re kisu wese hag deg.

⁵TUHAN nakni, it ap homi enolok etma enomamne fam en nalong baloho fahat-nusug lamin, it ap enobabut haro fam an siaho nobahaul ulug duruk on etma fam en an hwal-napuk kamin.

⁶It ap winik-wonog angge on etman de ling-long angge an nobahet sabu yep duruk, ne sum ahe sum wiriloho an sen-napul ulug duruk. Di kwe su kwe re an nebe yohwat atmisi ane eleg a, ulug sapna leheruk.

⁷TUHAN nakni, an den uruk kwit de: An nakni Allah re we hat neg, an den heng-hapuk kahi on ai fu nobahain.

⁸An nakni TUHAN Allah aire, an nahap wendat-napuk kahen on mun homamne on, An weim yapukmu en Haren neg nalong baloho fahat-nusug lahen.

⁹TUHAN nakni, ap enolok on etman enenda boruk ale on fahet Haren enele hole fesouk fug, iren wene duhuk ulug matuk on etma dip amag ulug debesouk fug.

¹⁰It an naselei on etma enalong amag ulug embesouk fug; iren enele siag on fam uruk kwit an nunuk siahapdoho foruk on etma it enonggwareg enobam aik waharuk kamag.

¹¹It enebe fam indok anggen hililik waharuk kamag, ne it enebe kiling ele waratuk on fam hwik-esaukmu wilibik wamuhup hayog.

¹²Ap enobabut hape on fam neg duruk on etma anggin-fanggin on neg enobam aik waharuk kamag, it ap homi enebug siag on balduk on etma kwenangma suma welamag ulug embesouk fug.

¹³Haren ap homi mun sebeleg on enobahet wene katukdoho neg debeseheg, it enenggik eleg enawene fahet inibil aheg, duruk kahen ale ai an mun noluk deg.

¹⁴Ap homi dik-demdoho neg duruk on en Hat mot-hapuk kamuhup; it enebe Hat hinim seberoho welamuhup.