Read Ninia Yali MAZMUR 141 Bible Online

MAZMUR 141 - Ninia Yali bible

MAZMUR 141

¹Daud asuni. TUHAN nakni, an den Hat hobam hwi-hapuk kahi, folo-foloroho let-nabik ma! An den Hat fam wol-heauk halug de hesanggo hol-nabiyug.

² An den somban uruk kahi on aire amben fano angge dupa Hat hobahet og-hutuk on hagdoho wakiyug, ne nenggik earoho lahabeg lahi on aire hup anggo hobahet waroho yalduk angge hag debeiyug.

³TUHAN nakni, nambilik kahal-nusug lit, nambilik bum hil-alongdoho fahat-nusug lamin.

⁴Siag duk ale napuk on ai yatma debeik lauk kamin, An it ap enobabut kwasikdoho duruk on nim seberulug, ne it enesoni osohoma inim ninim nowag ulug nim fotog nea fug.

⁵Ap fano on eke en an nenggali ware-nobaharuk halug, ne enda mun bekit fam komo ale ware nobaharuk halug, an de ai fahet de ahalue mun ebe on hag deg boruk kahi. Iren enolok fam duruk ale ai fahet an den hundig-handig somban uruk kahimu re ai on fahet an den embesehuk fug lamag.

⁶It enowesi enalong wereg on helep il kwe hwik-esalaman de an den nele uruk kahi on etma demdoho bouk alereg.

⁷Helep welelenggendoho kwenangma belabe feseruk hag, nit nenowag oho ap homi wareg sal-enepukmu aluluk kwe etma damulik lahup.

⁸Famen de nakni TUHAN Allah, an de we Hat hobam neg nenda ebereg welahi, an de Haren neg nalong balegma welahimu an waramag ulug fotog nea fug.

⁹Ap en sabu an nobahet ulug yep duruk on etma fam en nim, ne sapna it ap enolok enap en leheruk on etma fam en nim, nalong baloho fahat-nusug lamin.

¹⁰It aire enonggwareg en sabu yepdeg on etma fahet luhut atuk kamag, famen an neg de nahap wendareg neg welaruhuk lamag.