Read Ninia Yali MAZMUR 143 Bible Online

MAZMUR 143 - Ninia Yali bible

MAZMUR 143

¹Daud asuni. TUHAN nakni, an den somban uruk kahi on ai hesanggo hol-nabin, an den heng-hapuk kahi on ai fahet fubi-nobahain. Haren mun dipdoho neg duruk kahen anyo fam onggo hweag-nimin, Haren katukdoho neg duruk kahen anyo fam, ‘nesanggo holihi’ in.

² An su re Hat hamingming angge deg lahimu re, ayo wit-nabuk fug, ap homi eke siag duk fug angge en Hat holohotma wereg fug anggere.

³It naselei on an siko-muko apuk kwit mabenapdoho nobaharuk, ne iren an nebe foldongdoho re sabu hetdoho feserukmu mun mum fam etma nobaharuk; An de ap enebe endam waratswa on hag atihik.

⁴An nahayeg wereg on anyo mundoho songgo isi, nendama re mundoho nong-hong uruk kahi.

⁵An den li atam welatihik on etmano ebet hauk kahi, Haren dirihin ale etmano ebetuk kahi, Haren henggik fam wal-dirihin on fahet meneni ebetuk kahi.

⁶An nenggik earoho lahabeg lit Hat hobam somban uruk kahi, kwenang mun iringgig on en hag, Hat hobahet an nendaman mun anggolo napuk.

⁷TUHAN nakni, an nobam mundoho song eheikma re, Haren onggo folo-folo hweag-nimin. An nebe ap waratlug laukmu etmano wambik lauk on hag ahiha no ulug, Hat hebe an fam en herag am fug.

⁸An de Hat hobam neg nenda ebereg welahimu re, di hubet su hubet etma Haren henda hundig-nusug lit welahen ale anyo fahet an ebet-nutuk kamin. An den Hat hobam neg somban uruk kahimu re, an kwe lowag ulug Haren neg unug nutuk kamin.

⁹TUHAN nakni, an de Hat hapma nalong baleg welamag ulug lombog ik waharuk kahi, it naselei on etma fam en loloho nobahain.

¹⁰Hat hebere an nakni Allah deg lahenma, Hat henda hahayeg boruk kahen ale etma neg duruk kamag ulug mamul-napuk kamin. Hat de henda mun fanoreg lahenma, ne Haren kwe nunggulig on fam melal-naplug lauk karuhun.

¹¹TUHAN nakni, Haren hele sali irihin ale higitdoho an del-nabin, Hat honggwareg fano on deg lahen ai fam an anggolo hauk kahi on su fam en loloho nobahain.

¹²Hat henda hundig napuk kahen ai fam it naselei on etma mun enowaroho fesein, an de Hat hamingming angge deg lahimu re it an sebeloho nobaharuk on etman mun elehapdoho fesein.