Read Ninia Yali MAZMUR 144 Bible Online

MAZMUR 144 - Ninia Yali bible

MAZMUR 144

¹Daud en ebag on. TUHAN aire an nalong bal-nusug on deg ma At neg motdeg welamag! Aren de an dog yabukwag ulug melale-nobahakeg, weim yabukwag ulug mamuli-nobahakeg duruk.

²At aire an let-nabeheg, nibil aheg, duruk on, an nahap wendat-napuk on an apma lombog ik lauk kahimu. At aire an nalong bal-nusug on an akit longgoik lauk kahimu, Aren de ap homi di enunggul unuk su enunggul unuk etmano an napma sebele feseruk.

³ TUHAN, ap aire nangginig on deg en Haren fubi debeseruk kahen? At aire ebe sa deg en ulug Haren fano fahat-enusug lahen?

⁴Ap homi aire hol misiham fi hauk on hag, enahohwe lauk on ai hagdoho enebe enoluk airoho wereg.

⁵TUHAN nakni, Hat hambohol hut halug hebe wambik ma, dom-dom etma hobu wilibukwag ulug bal hakin.

⁶It haselei on buhul-bahal esowag ulug Haren haoweal hwik-esakin, it enele saha-faha ukwag ulug handog fotog-esakin.

⁷Hat hebe boholman henggik sen-neawatlug, ik fu waharuk on fam en liloho nobahain, ap bohon etma enomamne fam en nahap wendat-nabin,

⁸iren enele seiale eheg, laloho eheg, ne hombuk obahatman baleheg, duruk on etma fam en wenelat-nabin.

⁹Allah nakni, an den Hat hobahet suni keron uruk katmin, suni uruk kwit binggong kecapi kong-duruk katmin.

¹⁰Haren neg it raja fam enalongap debeseruk kahen, ne Hat hamingming angge Daud oho lili-foruk kahen.

¹¹Ap enolok mun siag on etma enenggarog fam en dele nobahain, ap bohon etma enomamne fam en nahap wendat-nabin, iren enele seiale eheg, laloho eheg, ne hombuk obahatman baleheg, duruk on etma fam en.

¹²Nit nenomaliki ap angge etma it enebe sauweman de, a yaho angge log atuk hag amag. Ne it nenahwelani etma e hun raja obam olma, unggut kwe hwesesengge oko lahabeg etma hagdoho amag.

¹³Nit nenobam olma di angge su angge forukmu etma re, di on su on kwenang fam yatuk angge etma anggen baleg en mun hoporeg lamag. Nit nenowam domba o leimu wereg on etma, enomalik ondoko mun hum-hamdoho saha ukwag.

¹⁴Nit nenowam sapi etma mun hum-hamdoho saha uruk kwit, eke longgo uruk ale mel fug men, ne eke omalik wiri watuk ale mel fug angge welamag. Nit nenobam kota etman kobokwe kwe etma, anggin-fanggin hauk kwit eke nenek duruk kamuhup hayog.

¹⁵It ap homi enunggul unuk aireg on etma re mundoho enahayeg hauk kamag, it ap homi enakni re TUHAN Allah deg etma re enahayeg hauk kamag!