Read Ninia Yali MAZMUR 145 Bible Online

MAZMUR 145 - Ninia Yali bible

MAZMUR 145

¹Daud en mot-debag suni. Allah nakni, Hat de Raja an den welahenma, an den hunuk leho-hobaharuk katmin, ne li mundoho-mundoho etma Hat neg mot-hapuk karuhuk.

²Nukoho hundig-hundig an den Hat dang-habeheg, ne li mundoho-mundoho etma Hat leho hobahakeg, duruk karuhuk.

³At TUHAN ebe re mun leho on wereg lit mun motdeg wereg ai fam, ne At andung-dang wereg on aire ilit ha fug alereg.

⁴Di li su li etma ap en Haren duruk kahen ale fahet mot-hapuk kamuhup ne hanggiluk welahen ale fahet fag-duruk kamuhup.

⁵Iren de Hat leho welahen ale fahet inim hombagbag welahen ale fahet inim, hweag-esauk kamuhup, Haren dirihin mu mun nobam fog deg on etma fahet, an den meneni ebetuk karuhuk.

⁶Haren mun fulu-bolan ale duruk katihin on etma fahet iren uruk kamuhup, Hat handung-dang welahen ale fahet an den fubi-hobaharuk karuhuk.

⁷Ap en de Haren mun fano ale duruk kahen on fahet dindilduk kamuhup ne katukdoho neg duruk kahen on ai fahet suni uruk kamuhup.

⁸TUHAN aire enda-enusug lit enelaheg esauk on, folo-folo olok duruk fug, ne hundig-hundig enda hundig-nenepuk.

⁹Ap homi enebe domog fam At enda mundoho fanoreg, di angge su angge wal-debag on abirangge fam enda-hundig enepuk.

¹⁰TUHAN nakni, di angge su angge Haren wal-dirihin angge etma mundoho en Hat neg mot-hapuk kamuhup, it Hat homaliki mundoho en Hat neg dang-hapuk kamuhup.

¹¹Hat hebe Raja wereg lit halong wereg on ai fahet iren leho hobaharuk kamuhup, ne hanggiluk welahen ale ai fahet dindilduk kamuhup.

¹²ai fam it ap homi mundoho enoluk atuk kwit Haren dirihin ale etma re mun hum ale dirihin, kerajaan Haren on aire mun ambogbagdeg ma anggiluk deg.

¹³Hat hebe leho wereg lit melal-nenepuk kahen on aire li mundoho-mundoho etma welaruhu, Hat halong welahen on aire aham duk fug angge di li em su li em etma welaruhu. At TUHAN de ele sali isi on fam de dipdoho neg duruk, Aren duruk ale fam etma re mundoho enda-hundig en duruk.

¹⁴TUHAN en de ap homi enobam anggin-fanggindoho wereg on let-enepuk, ap homi sebeleg on de leho feseruk.

¹⁵Di on su on enoluk wereg angge etman Hat hobam neg enenda ebereg wereg, li higitdoho Haren it nauk on og-esauk kahen.

¹⁶It anggoloreg angge etmano Haren dipdoho neg debeseruk kahen, ai fam iren eleg angge eke wereg fug.

¹⁷At TUHAN en duruk on etma fam de mun katuk deg ale neg duruk, Aren duruk ale fam etma re mundoho enda-hundig en duruk.

¹⁸At de ap homi At fam hwiruruk on fam horog deg wereg, ne it enenda mun bekitdoho wol-duruk on fam horog deg wereg.

¹⁹Ap homi At fam enakol bolug duruk on de Aren enendama enahayeg ale neg debeseruk; iren enele uruk on Aren esanggo holug enahap wendat-enepuk.

²⁰Ap homi At fam enenda hundig boruk on de Aren enalong baloho fahat-enusug, famen de ap homi enolok on de Aren elehapdoho feseruk.

²¹An de hundig-handig At TUHAN mot-duruk karuhuk, it mundoho enoluk wereg angge etman li mundoho-mundoho etma fam TUHAN unuk neg mot-duruk kamag.