Read Ninia Yali MAZMUR 146 Bible Online

MAZMUR 146 - Ninia Yali bible

MAZMUR 146

¹TUHAN neg motdeg welamag! An nebe su, TUHAN neg mot-din!

²An nebe noluk wereg lit eta TUHAN neg mot-duruk karuhuk ne an nebe nil owag wereg kweleg eta suni At nakni Allah fahet uruk karuhuk.

³It ap enalong wereg on fam henenda ebereg welam fug, ap homi henahap wendaruk eleg on fam ebereg welam fug.

⁴It enebe waramuhup halug de nikangge kwenang amuhup, nukoho ai salim neg iren di duhuk su duhuk ulug abug wereg on anyo eleg aruhu.

⁵It ap homi enakni TUHAN Allah obam enenda hembisi folug duruk on etma enahayeg hauk kamag, it let-enepuk on de at Yakub akni Allah ai debelug wereg on etma enahayeg boruk kamag.

⁶ Aren neg bohol inim kwenang inim wal-debag, laut inim ilonggoma wereg angge etma nim Aren neg wal-debag; At de mundoho-mundoho etma dipdoho neg duruk karuhu.

⁷Ap homi sebeleg on enangge fahet it inibil atlug inili wauk, ap homi siburu obok deg on fam Aren nauk og-esauk. It ap homi sabu hetdeg ma wereg on Aren loloho wilibi feseruk,

⁸ap homi inil hupnig on inili fenggene feseruk, ap bule wamburuk on Aen enomamneroho unduhuk feseruk, ap homi bekitdoho neg duruk on Aren enda hundig-enepuk.

⁹Ap bohon Aren enalong bal-enusug; it homi sohwe on nim omalik wetien on nim Aren let-enepuk famen de ap homi enolok on en duhuk ulug uruk on omano Aren eleho feseruk.

¹⁰TUHAN aire mundoho-mundoho fahet Raja welaruhu. Hat Sion, Hat hakni Allah aire ketia nim fobik mundoho-mundoho nim etma along on welaruhu. TUHAN motdeg welamag!