Read Ninia Yali MAZMUR 147 Bible Online

MAZMUR 147 - Ninia Yali bible

MAZMUR 147

¹TUHAN mot-diek! At mot-duruk ale aire mun fano alereg ma, ne At obahet suni motdeg suni uruk ale aire mun nenahayeg alereg ma angge re!

²At TUHAN en neg o Yerusalem hwale fohu; ap homi sabu hetdoho hwik-enebik lausa on etmano Aren neg og-eneplug sombandoho feseik waruhu.

³Ap homi enenda mun wat-dalug wereg on de Aren neg hilinggi feseruk, it eneyebil etma Aren neg het-debeseruk.

⁴Aren neg sohwalanggen koloma wereg on etma abirangge seberoho fahet wenaho foruk, ne enemu domog Aren enunuk soale-feseruk.

⁵Nit nenakni TUHAN aire mundoho humon nik ale duruk on, At enda wenggeleg neg deg on aire huli-huli fouk fug alereg.

⁶Ap homi sebeloho feseruk on de Aren neg leho feseruk, famen de ap homi enolok on de kwenangma hwik-esauk.

⁷Nit nenakni TUHAN obahet suni mot-duruk suni wilibiek, nit nenakni Allah obahet binggong kecapi kong diek.

⁸Aren neg anggulog bohol fam etma wang debebag; kwenang fahet Aren osit fouk debesi, ne dukmu enggelangge wilibi febag.

⁹Di wam su wam nauk angge Aren neg og-esauk, ne suwe ket-ket suwe omalik en ele ninuk-nanuk uruk on fam oho og-utuk.

¹⁰At TUHAN ambono on de kuda omamne on fam fug; ne it ap sehen foroho on enambong sereg fam oho re fug.

¹¹At TUHAN de it ap homi At fam enakol boruk fahet neg ahayeg deg, ap homi Aren enda hundig-nenebukwag ulug obam ebereg wereg on neg ahayeg.

¹²Hat Yerusalem! TUHAN mot-diek. Hat Sion! hakni Allah mot-din.

¹³Aren neg hasok humon etmano omamne deberuk ai fam, ne it ap homi o ai fam wereg on etma fanoap debeseruk ai fam.

¹⁴Hit henobam etma henakol eleg angge welamag ulug Aren neg kahaleg wereg, ne Aren neg gandum ebe on fam homo-henobaharuk.

¹⁵Aren kwenang fam wene melale-feserukmu re, At ele uruk on anyo folo-foloroho neg duruk.

¹⁶Aren de lumbiag no kapas hagdoho belabik waharuk, ne lil olom deg angge re kwenang ahe hagdoho belabik waharuk.

¹⁷Aren osit lumbiag de helep anggen hag angge belabik waharuk; di angge su angge en eke habup deg ma hambuk halug wereg fug.

¹⁸Airoho debelug At ele miming fam, lumbiag anyo oweruruk; Aren hol fu-rik waharukmu re ik wiliboho wirig atuk.

¹⁹Aren ele yonggo omaliki fam hweag-esauk, ne wene melaleg unduhuk fesi on nim diroho diyug suroho diyug ulug wereg on nim de At omaliki mamulig on fam hweag-esauk.

²⁰It ap homi enunggul unuk amu on fam de airoho duruk fug, ite Aren awene unduhuk wereg on etma enepeleg deg wereg. TUHAN mot-diek!