Read Ninia Yali MAZMUR 148 Bible Online

MAZMUR 148 - Ninia Yali bible

MAZMUR 148

¹TUHAN mot-diek! Hit bohol ilonggoma yohwareg welahep on etman TUHAN mot-diek! Hit obale mun lehoma welahep on etman, TUHAN mot-diek!

²Hit malaikat Aren on etman, TUHAN mot-diek, tentara hit bohol fam welahep on etma mundoho en, At neg mot-diek!

³Mo inim bigalem inim en At neg mot-diek, hit sohwalanggen ili-fea uruk kahep on en At neg mot-diek!

⁴Hat bohol mun leho lahen on ai en, At neg mot-din, ik bohol emberimmu wereg on[74] etman, At neg mot-din!

⁵It etma mundoho en TUHAN mot-duruk fano, it abirangge etma re Aren ele miming fam wal-atswa anggere.

⁶Aren neg obale domog momale fesi, Aren wene melaloho unduhuk fesi on aire mundoho-mundoho[75] fahet.

⁷Kwenang ilonggoma welahep on en TUHAN neg mot-diek, hit kisu naga laut nim ik ahum emberim nim en TUHAN mot-diek;

⁸hit oweal mel, osit lumbiag on mel, osit helep anggen on mel, hena mel, hol omamneroho TUHAN ele melaleg holoho firuruk on mel etman TUHAN mot-diek!

⁹Hit duk-duk inim dom-dom inim en TUHAN neg mot-diek, e anggen yihiruk on mel, ohwei mel en;

¹⁰di wam su wam endetuk on mel, maro on mel, di on su on kwenang kwe loboruruk on mel ne suwe mel en TUHAN mot-diek!

¹¹Hit raja mel ap homi enunggul unuk angge on mel, ap enowesi kaindeg mel, enalong wereg enap mel;

¹²hit duhum on sauwe on mundoho mel en, ap sauwe on sobal on mel en, At neg mot-diek.

¹³It di enunuk su enunuk mundoho sebeleg kweleg, At unuk neg de bogdeg wereg ma, ne at anggiluk wereg on de bohol kwenang inim sebeleg kweleg mun emberimmu leho wereg ma, it mundoho en TUHAN unuk neg mot-duruk kamuhup fano.

¹⁴Aren de omaliki enunggul unuk Aren on etmano enomamneap debesesi, ai fam de At omaliki en mit-motdoho lahabe foruk kamag, it Israel omaliki enda hundig on etman. TUHAN mot-diek!