Read Ninia Yali MAZMUR 16 Bible Online

MAZMUR 16 - Ninia Yali bible

MAZMUR 16

¹Daud Asuni. Allah nakni, an den Hat hobam neg nalong baleg welahimu re, an kahal-nusug welamin.

²An den uruk kwit de, “An nendama mun nahayeg hauk kahi on aire we nakni TUHAN Hat neg welahen, Hat welahen on ai hemberimmu dahandoho eke wereg fug!” uruk kahi.

³Ap homi o kwenang su fam en enebe ene fahat dalug wereg on etma an den it enalong bolug leho feseruk kahi; ne it ninim seberoho wereg ale aire an nambono alereg.

⁴Ap homi en kembu dewa fam apne wauk on etma, enebe fam eke nim enenda hesil atuk kwit neg welamag! Ne, ande kembu dewa enobahet di angge su angge waroho og-utuk ale etma re mun nerim, ne it enunuk uk ale ohore mun nasugun deg lahi.

⁵TUHAN nakni, Hat hebe aire an nonggwareg nangge hag deg lahen; An den di angge su angge anggolo deg lahimu nealug de we Haren neg og-nutuk kahen. Ne, an fobik aruhuk ale mel, welaruhuk ale mel, etma re we Hat henggikmu neg wereg.

⁶Haren og-nutuk kahen angge etma re we mun buhun-bahan angge neg og-nutuk kahenma re, an nendama hambukdoho deg laruhuk!

⁷At TUHAN en de an komo napuk ai fam de At neg mot-duruk kahi; ne o hup angge famen oho re an nenda anggen en enggare nobaharuk.

⁸ Hundig-handig an den TUHAN ebet hauk kwit neg welahi; At de ebe an naluluk wereg ma re an dalorihi ha fug alereg.

⁹Haren de an nebe waramag ulug lin nobaharuk kahen fug; ne ap homi Haren Henda hundig-enepuk kahen on etma re enebe eleg atuk kamag ulug embeseruk kahen fug mu re,

¹⁰ ai fam de an nendama inim, naheime fam inim mun nahayeg napuk, ne nebere mun finik-fanoroho nahap wendareg laruhuk.

¹¹Haren de an kwe enoluk mundoho wereg on anyo fam lauk kamag ulug unug-nutuk kahen; Ap homi di angge su angge hum hamdoho hwelauk hag, we Hat fam en neg nahayeg hauk on mel, ne nebe mundoho fanoroho welamag ulug mel nobaharuk kahen.