Read Ninia Yali MAZMUR 17 Bible Online

MAZMUR 17 - Ninia Yali bible

MAZMUR 17

¹Daud en Somban ebag ale. Wene katukdoho on neg nobahain ulug nele hwi hapuk kahi on ai hesanggo hol nabin; Nakni TUHAN, an nenda mun bekitdoho deg lit somban uruk kahi on ai fu nobahain.

²Demdoho wene aire Hat mundoho holuk deg ma, an nawene su fahet nili og-nabin.

³Hat hebe o hup angge an nakit watlug an nebe deg lahi ale kumu neeheg, nendama nabut baloho deheg, dehen ha man de an den nele uruk kahi on etma re nendaman wenggelhauk kahi aleroho neg uruk kahimu re, ap su mun bekitdoho neg duruk on ulug hweaho-nobahaken ha alereg.

⁴An de it ap homi en enenggik omamne fam siahap debeseil lauk on ai fam lauk kahi fug; ite Haren diroho diyug suroho diyug ulug melale-nobaharuk kahen ale anyo neg duruk kahi.

⁵An de Haren diroho suroho duruk kamuk ulug unug nutuk kahen aleroho neg duruk kahi; ne Hat fam en dahandoho wilibik lauk kahi fug.

⁶Nakni Allah, Haren de an den nele hweag-hutuk kahi on hole nobahalug neg duruk kahenma re, an den Hat hobam neg nele hwi-hapuk kahi; An nele uruk kahi on etma hesanggo hol-naplug de, hil fubi nobahain.

⁷Ap homi Hat hobam enalong baloho wereg on de Haren neg enahap wendat-enepuk kahen, ne Hat haluluk de it enaselei on fahet enakol eleg angge wereg ma re, Haren fulu bolandoho Henda hundig nenepuk kahen on ai unug nesakin.

⁸An nebe Hat hil anggen ilonggoma on hagdoho hwal-napuk kamin, ne it ap homi siag duruk on en mug-neaukmu Hat hahwerabul apma kwelabe nobahain.

⁹An den it naselei on etmano en nowarukoho walinggoho kwelap-nabik waharuk;

¹⁰it enebe re enenda enepuk ale aire mun enapeleg, ne enele ohore enawonog fam neg uruk.

¹¹Iren an nowarukoho watlug de hwililipdoho kwelabe nobahalug de, kean waroho fulambe deboul ulug inil og-nabil lauk.

¹²No singa en aren waroho nauk angge etmano hweaho folug houmdoho namin ulug duruk hagdoho mel, singa ket sauwe on en enggelama heraho angge wilipuk kwit kwema orohole balduk anyo hagdoho mel, iren airoho duruk.

¹³Nakni TUHAN, Hat hebe feiyaloho inatlug, an naselei on etma hinim wal-wal atlug de it enalong elehapdoho fesein. It ap homi siag duruk on ai en an nowarukoho waharukmu ai, Hat henggarog fam en nahap wendare nobahain.

¹⁴It ap homi o kwenangma suma enangge kabog-duruk kwit neg wereg on ai fam en loloho nobahain. Anggin fanggin it ap homi ai enobam fesehuk on ulug Haren foukdoho feserihin on anyo fam it unggum og-esakin. Ne, it enomaliki mel enombasi mel oho unggum enobam feseiyug neg.

¹⁵Famen de an neg de siag duruk kahi fug mu re, Hat hebe nil heahuk. An nebe nohorukmu en noluk inatlug de, Hat hebe hundig-handig ninim welahen ale ai fahet nendama mun nahayeg napuk.