Read Ninia Yali MAZMUR 18 Bible Online

MAZMUR 18 - Ninia Yali bible

MAZMUR 18

¹Ap homi en suni wilibi folug enebe seberoho uruk kweleg melal-enepuk on fahet. TUHAN amingming angge Daud anyo asuni. At Daud ebe it aselei on fomane nim at Saul enggik fam en bologdoho wilip atfagdeg TUHAN suni ebag on.

²TUHAN nakni, Hat hebere an nomamneap napuk on welahenma re, Hat hobam nenda hundig-hapuk kahi.

³At TUHAN aire an nebe nalong bal-atuk kahimu, fag lehet mun omamne on an mapnu nobaharuk hag deg. An nakni Allah aire helep owik an mapnu atuk mu hagdoho deg. Ap en dog beiangge ambol fil mapnu atuk anyo hagdoho Aren an mapnu nobaharuk; ne an nebe hundig nambong seroho welamag ulug de Aren neg kahal-nusug wereg.

⁴At TUHAN aire mundoho mot-duruk kwit neg welam alereg on deg ma, at obam an den nele hwiruruk kahimu re, it an naselei on fam en an loloho wilibi nobaharuk.

⁵Waratuk on anyo en de an maseroho kwelap-nabik waharuk, ne ik yenggeldil laharuk hagdoho ap homi enebe eleg aik lauk on anyo en sal-napil lahaik waharuk.

⁶Waratuk on anyo en de an maseroho kwelap-nabik waharuk, ne waratuk on aire sabu yepdeg ma hagdoho an nalukwema yepdeg.

⁷An nebe mun nong-hongdoho wereg lit an nakni TUHAN fam nele hweag-utuk kahi, an let-nabukwag ulug nakni Allah fam hwiroho lahapuk kahimu re, At obam olma etmano en an nele uruk kahi on anyo hol-naplug, nele hole nobaharuk kwit fu nobaharuk.

⁸Airoho hole-nobahalug At Allah mundoho olok atuk mu, kwenang lang deheg, elek deheg, disi ne dom indip yaho on etma kwel deheg, daloreheg, disi.

⁹Hobu re ambiang elma en baloho wilibik waheg, ne indok ambulbul mel indok ambiang mel de At ele elekwe en wilibik waheg, disi.

¹⁰Bohol heal halug de At ebe hena heik deg on nim eyogma boroho walug wambik wahasi.

¹¹At ebere malaikat on enunggul unuk eke kerub [10] ai fam emberimmu sahaliroho daruruk; darulug de At ebe ahwerabul hol emberim fam noruk.

¹²At ebere heik sahalimu etma hwililipdoho wereg, ne anggulog mun heik on de At ebe maseroho kwelabeg.

¹³At olohotma oweal wereg on etma fam en de, anggulog mel, osit lumbiag mel, indok mel, wilibik waharuk.

¹⁴Airoho wilibi feik watlug de koloma etleman de At ele kululuk duruk; At Mun Leho wereg on anyo ele[11] hol-nabukwag ulug wilibi foruk.

¹⁵Aren andog leg-hauk on de, it Aselei on etmano del fol esauk; Aren de oweal anyo bale fouk fug angge lepengdoho sal-enebik waheg neg duruk kwit wereg ma re, it anyo enakol en bupa uruk.

¹⁶At TUHAN en At aselei on fam ele bererag esaukmu re, kwenang ahum erahamuno enam atuk ne kwenang indip doaleg on etmano seleg atuk.

¹⁷Emberim fil etlendima en de At TUHAN enggik belabe feik watlug de, an nebe seneko ik ahum mun yaron fam en feiyaloho lahabe nobaharuk.

¹⁸It ap homi an naselei on enebe enalong enap etma fam en nim, it ap homi an enerim napuk on famen inim, it mundoho enomamne humdeg ma, an nomamne eleg dehen de, At TUHAN en an nahap wendat napuk.

¹⁹An fam anggin fanggin atuk li em etano iren nowarukoho dik waharuk, famen de At TUHAN anyo an let-napuk on atuk.

²⁰Aren de an fahet endama ahayeg borukmu atlug de, ap youkdoho weregman ohore an loloho wilibi nobahakeg, nahap wendare nobahakeg, duruk.

²¹An den nobabut fam demdoho on neg duruk kahimu At TUHAN en onggo higitdoho neg nobaharuk, an den eke siag on dirihik fug mu re Aren an fanoap nobaharuk.

²²An den At nakni Allah fam en nanduhun hwareroho lauk kahi fug; TUHAN awene melaleg anyo an den mun holoho neg duruk kahi.

²³Aren wene diroho diyug suroho diyug ulug ebag wene anyo an den fik-furoho fubi deberuk kahi; At awene melaleg aire an den lohon dahandoho duruk kahi fug.

²⁴An den siag on duruk ale embeseheg, kwasikdoho duruk ale on ai ahayeroho laheg, duruk kahi ale aire Aroho mun oluk deg.

²⁵An den nobabut fam demdoho on neg duruk kahimu At TUHAN en onggo higitdoho neg nobaharuk; An den siag ale eke dirihik fug mu re Aren an fanoap nobaharuk.

²⁶TUHAN nakni, ap homi dipdoho neg duruk on fam halug de Haren oho dipdoho neg debeseruk kahen; ne fano ale halug de it ap homi fano ale neg duruk on fam debeseruk kahen.

²⁷Ne, it ap homi enebe eneko fahat dalug wereg on fam halug de Hat hebe mun eneg welahen ale anyo ebename feseruk kahen; famen de ap homi siag duruk on halug de Haren ha weim enusug lahen.

²⁸Ap homi enenda sebele fahat dalug duruk on halug de Haren enahap wendare feseruk kahen; famen de ap homi enonggwareg en leho fahat-dauk on halug de, Haren sebeloho feseruk kahen.

²⁹TUHAN Allah Haren de an neral ombagbag nobaharuk kahen; An fam mum on deg ma re Haren neg selehap deberuk kahen.

³⁰It ap homi an na weim on enowaroho fesoukwag ulug Haren neg nomamneap nobaharuk kahen; At Allah en let napuk fam neg it naselei on en enomamne wereg ma indip anyo fam dolulu kwik lauk kahi.

³¹At Allah en duruk ale aire mun fano ale on neg duruk; ne At TUHAN en sali wat-nesasi on aire demdoho neg boruk kahe ha alereg. It ap homi mundoho en At fam nenalong baleg welamag ulug dobahat dalug wereg on de, it fahet At ebe dog beiangge hag atlug welaruhu.

³²At Allah aire we TUHAN amu neg wereg; ne nit ninili og-nenepuk on ohore Allah At neg.

³³An nomamneap nobaharuk on oho re At Allah ai en neg; ne Aren neg an kwe fam nambong seroho lauk kamag ulug nobaharuk.

³⁴ No rusa owag omamnereg hagdoho Aren an neiyog omamneap nobaharuk; o dom kwe laukmu an nahap wendareg welamag ulug Aren neg hwal-napuk.

³⁵An dog yabik lowag ulug Aren neg milil-melale nobaharukmu re; sehen mun omamnereg on famen ohore ningdoho lisihi ha alereg.

³⁶TUHAN nakni, we Haren neg an nalong bal-nabeheg, nahap wendat nabeheg, duruk kahen; ne Hat homamne fam neg an ahoroho fahat nusug lahen; Haren napuk kahen ai fam de an ap lohon hagdoho nobaharuk kahen.

³⁷An ap en sen-naplug hele wat-naplug la no ulug Haren neg kahal-nusug lahen; ne an nowag lohon dahan-fahandoho wat-dauk kahi fug.

³⁸An nebe nakol en lohon ik debouk fug angge it naselei on etmano mug-eneplug lauk men neg de it enalong elehapdoho feselug, it enebe mundoho eleg atuk mu neg embeseruk kahi.

³⁹An den waroho fulambe debeseruk kahimu re it enebe feiyaloho inam fug ale atuk; an neyogma etma waroho ying-atlug de libik-lebe uk fug aleroho neg atuk.

⁴⁰An weim yabukwag ulug Haren neg nomamne og-nutuk kahen; ne it naselei on fam en an nalongap nobaharuk kahen.

⁴¹It naselei on etmano an weregman enakol en lowag ulu Haren neg nobaharuk kahen; ap homi enerim napuk on de an den mun elehapdoho feseruk kahi.

⁴²Iren enele hwiruruk famen de ap en eke let-enebik waharuk eleg; ne iren TUHAN fam enele hweag-utuk famen de Aren onggo it hweag-esauk fug.

⁴³Ul ahe baloho deg bog uruk anyo hag an den mun al bereloho feseruk kahi; ne sabelep kobokwe kwe wereg anyo hag an den dig-dag esauk kahi.

⁴⁴It ap homi Hat hele sahaloho duruk on fam en Haren fiselaroho nobaharuk kahen; Airoho nobahalug it ap homi enunggul unuk amu on, an den oho napeleg on etma an namingming angge wereg ma an it enobahet nalong wereg on unduhuk lamag ulug nobaharuk kahen.

⁴⁵It ap homi bohon en de an napma sebe uruk; an den diroho diek suroho diek ulug hweag-esaukmu re an nele holoho neg duruk.

⁴⁶It enambong seroho dil waharuk on anyo mundoho eleg atil lauk em de, enowag elek dil de it enomamneroho ulug inindipmu anyo en wilip atuk.

⁴⁷At TUHAN ai mundoho oluk wereg on! An nili og-napuk on ai neg motdeg welamag! An nakni nahap wendat napuk on Allah ai fam lik-louk deg ale fahet mit-motdoho lahabe foruk kamek!

⁴⁸It ap homi an naselei on fil maben atuk kwit an nalong amag ulug Aren neg nobaharuk; an nolohotman Aren ap homi di enunggul unuk su enunggul unuk etmano mundoho sebeloho feseruk.

⁴⁹Ne, an neg de it naselei on etmano fam en Aren nahap wendat napuk. TUHAN nakni, it ap homi an naselei on weregman Haren neg an nalongap nobaharuk kahen; it ap enabut mun hape on fam en Haren neg an nalong baloho fahat nusug lahen.

⁵⁰ Ai fam de it ap homi enunggul unuk-enunggul unuk wereg kwe etma Hat hunuk bog-debeil neg lauk karuhuk; ne Hat hobahet suni motdeg suni neg wilip-hapuk karuhuk.

⁵¹At Allah en raja unduhuk fahat dasi on fam de along humon og-utuk; Aren ap momaloho unduhuk fesi on ai enda hundig neg boruk on aire, at Daud inim at ambiangma on mel mundoho-mundoho fahet airoho enepuk karuhu.