Read Ninia Yali MAZMUR 19 Bible Online

MAZMUR 19 - Ninia Yali bible

MAZMUR 19

¹Ap homi en suni wilibi folug ambine urukmu melal-enepuk on fahet, Daud Asuni anyo.

²Bohol en de At Allah andung-dang wereg ale anyo ename foruk, ne bohol sohwalanggen wereg ma etman de Aren wal-debag ale anyo fahet bilingguruk.

³Nukoho eke en de nukoho eke ombolim on anyo fam oluge foruk; hup eke en de hup ombolim on fam dindil-utuk.

⁴Airoho urukmu it enele mel ngulug-ngulug angge mel uruk eleg, it enasisinggip oho lohon hol-hauk fug.

⁵ Famen de iren airoho deg ulug uruk ale aire o kwenangma suma mundoho anggungga dik lauk, ne it enele aire o di o su o mundoho saha ik lauk. Mo fahet At TUHAN en obam bohol fam wiroho fesimu re,

⁶ap eke en ohwe hwelaroho obam ilonggoman wilibik waharuk hag, ne ap enakni kwe lamin ulug indip duruk kwit ahayeg duruk hag, mun hubet-habet etano at lahabik waharuk.

⁷Lahaik watlug de o bohol anyo ambiang foman de ambiang foma fil lauk; at ahanhandeg alere ap homi enobam atuk fug on eke wereg fug, mundoho enobam atuk neg.

⁸TUHAN Awene melaleg aire mun dipdoho neg deg ma re, Ap homi enendama sakoap enepuk. Aren diroho diyug suroho diyug ulug baleg wereg on aire ap homi di ale su ale enapeleg on famen oho re enenda enggare feserukmu re, demdoho neg bouk alereg.

⁹TUHAN en diroho diyug suroho diyug ulug baleg wereg on aire mundoho higit ale neg deg ma re; ap homi enendama enahayehap debeseruk. TUHAN en unduhuk fesi wene aire il wirik on deg ma re, ap homi en enendama fureboukwag ulug debeseruk.

¹⁰TUHAN obam wene kabog-duruk ale aire mun fanoreg ma re, mundoho-mundoho etma airoho neg duruk kamuhup. TUHAN Awene melaleg aire demdoho on wereg, ne abirangge katukdoho neg deberuk.

¹¹TUHAN Awene melaleg aire emas ebe on famen mun sebeleg kweleg ai neg de mun leho, kin ahalue ket dahanduk on unduk seram hag famen de wene ai neg unduk mun mitdeg.

¹²Mundoho airoho deg on ai an hamingming angge ebet nutuk; it ap homi wene ai holoho neg duruk on fahet de onggo humon it enobahet fouk deg wereg.

¹³Ap homi longgo ik lauk ale fahet it enonggwareg en eke enoluk deg fug; TUHAN nakni, an den kwasikdoho dirihikdeg heraho lahi on fam en fiselaroho nobahain.

¹⁴An siag dimin nenda wenggele folug dirihik on etma haren yatmaap debesein; an nasiag etman sebel nusug welamag ulug embesouk fug. Airoho nobahakun fam de an ap fano on aheg, di ale su ale dirihik fug on hag aheg, aruhuk.

¹⁵TUHAN nakni nonggo bal-nabeheg, nalong baloho fahat-nusug laheg, duruk kahen on, we an nele ihi on ai mel, nunggul owagma wenggelihi on etma mel, Hat henda hahayeg ale neg amag!