Read Ninia Yali MAZMUR 2 Bible Online

MAZMUR 2 - Ninia Yali bible

MAZMUR 2

¹ Nunggwelug ap homi enunggul unuk-enunggul unuk on etma amitmit duruk ne it suku mel enunggul unuk on mel we alemareg aireg ale etma abug balduk?

²It raja kwenangma wereg on omano ambine inatuk kwit ne it enalong wereg enap omano enele misig seberoho matuk kwit de At TUHAN inim ne raja Aren momaleg on nim enele sahalduk.

³It ap enalong wereg enap etman uruk kwit de, “It enomamne wereg on ai along elehap debouldeg nenemu fiselaroho welamuhuk en dukohon!” uruk.

⁴At TUHAN ebe hweriegma takhta fam en de unda yag-enepuk ne iren wene duhuk ale ulug balduk on ai fahet bulip-enepuk.

⁵Airoho dulug Aren olok fam it bereragdoho hweag-esauk, ne At olok ahe en it youk wilip-enepuk.

⁶Aren uruk kwit de, “O Sion[1] fam An nanduk mun enegma etma, raja An den momal-dihik on ai unduhuk ferihik.”

⁷ Raja en uruk kwit de, “An de TUHAN en wene unduhuk fesi on ai fahet demdoho bolug duruk katmin. Aren an nobam uruk kwit de, ‘Hat de An namloho, yoho su salim An hakni ahi.

⁸Haren heng-napukmu re ap homi di enunggul unuk su enunggul unuk etma hat og-huruhuk, ne o kwenangma abirangge aire hat honggwareg hangge on debehuk.

⁹ Haren de it ai handomuk besi on fam hilinggig angge en sombo-esauk karuhun ne ikwag kwenang on fam en hilinggig angge on hag erap-esahun.’ ” Ulug isi.

¹⁰Aireg ma re yaho hit raja en furebeyek, hit o kwenangma henalong wereg henap en ai wenggel-hakiek!

¹¹TUHAN fam henakol boruk kwit At obam neg kabog-duruk kamek,

¹²henowag elek duruk kwit[2] At alukwema henorohole belabeg sahaun-duruk kamek. At TUHAN olok atlug ne hit we il misiham neg elehap henebuk no, At olok aire we fetagdoho neg fulung duruk angge re. It ap homi TUHAN fam enalong baleg wereg on neg de enahayeg hauk kamag!