Read Ninia Yali MAZMUR 20 Bible Online

MAZMUR 20 - Ninia Yali bible

MAZMUR 20

¹Ap homi en suni wilibi folug enebe ambine uruk kweleg melal-enepuk on fahet, Daud Asuni anyo.

²Hat hobam anggin fanggindoho wereg ma etma we At TUHAN en neg onggo hweag-hutuk kamag, at Yakub akni Allah anyo omamne fam neg hat halong baloho fahat-husug lamag.

³At obam wereg ma etman hat letdoho ulug hobahet mon-habik wamag, ne Duk Sion fam en hat let habukwag.

⁴Haren At obahet di angge su angge og-utuk kahen on etma fahet ebet howag, ne haren wam waroho yal angge yal-utuk kahen on etma fam ahayeg howag.

⁵We Aren neg hat hendama di angge su angge hendareg on etma og-hutuk kamag; ne haren duhuk ale ulug abug wilibig welahen on etma ambiangma mundoho fano ale neg amag ulug hobaharuk kamag.

⁶Hat mundoho halong atuk ai fam nit nenahayeg en hemet duruk kamuhuk; ne nit nenakni Allah mot-dukoho lit bendera lauk kamuhuk. We At Allah en haren heng uruk angge etma mundoho holoho neg og-hutuk kamag.

⁷At TUHAN en raja momaleg on fam alongap deberuk ale ai an ketia noluk atuk. At TUHAN ebe boholma mun eneg ma etma wereg lit onggo hweag-utuk; ne At TUHAN omamne fam neg at raja anyo along atuk.

⁸It ap foma en de enangge kereta emberimmu lahalug lauk kwit dog apil lauk angge anyo fam enenda dip-deberuk, fomane re enowam kuda fam dip-deberuk. Famen de niren de nenakni TUHAN Allah anyo omamne fam neg dipdeg lahe.

⁹Ite eneyog dungdoho waroho ying-amuhup, famen nit neg de inatlug hambuk lele wareg lit unduhuk lamuhuk.

¹⁰TUHAN nenakni, Haren nit nenowe raja fam alongap debein; ne niren Hat wol-hapuk li em, Haren hele onggo hweag-nesauk[12] kamin.