Read Ninia Yali MAZMUR 21 Bible Online

MAZMUR 21 - Ninia Yali bible

MAZMUR 21

¹Ap homi en suni wilibi folug suni enebe ambine urukmu melal-enepuk on fahet, Daud Asuni anyo.

²TUHAN nakni, Haren neg at raja omamneap deberihin mu at ahayeg boruk; Haren at alongap deberihin ai fam de at mun awonog hauk!

³Haren de at endama boruk katsi ale anyoroho debeserihin, ne aren heng hapsi angge anyo Haren neg og-itihin.

⁴Hat hebe at akit waharuk kwit hangge di angge su angge fam fanoap debeseik waheg, at unggulmu kware-kware emas on fam wirig angge bug debeik waheg, dirihin.

⁵An noluk welale ulug heng isimu Haren og-itihin deg, at ebe oluk umur yatdoho welamag ulug deberihin.

⁶Haren let-hauk fam neg at ebe ap leho on atsi, Haren neg at ap unuk bogdeg anggiluk wereg on deberihin.

⁷Haren ap ai ebe mundoho-mundoho fahet fanoap deberihin; Hat hebe olohotma welahen ai fam at ahayehap kwelabe foruk kahen.

⁸At raja ai en de TUHAN Mun Leho wereg on ai fam neg enda ebereg wereg, at ebe TUHAN en enda hundig neg durukmu re akol eleg angge ambong seroho neg wereg.

⁹Aren de ap homi mundoho at fam enerim bolug eneseleiroho wereg on etmano sabu hetdoho feseheg, it ap homi en At TUHAN fam enerim boruk on etmano sen-enebeheg, duhu.

¹⁰It enebe elehapdoho feseikoho re, At ebe indok ambulbul ulog-ulog hagdoho waruhu. It enebe re At TUHAN olok en mel, indok han yal-enepuk on en mel, mundoho elehapdoho fesehu.

¹¹At raja en it enebe mundoho enowaroho fesehumu re, it enambiangma en ondoho on de fomane eke welamuhup fug.

¹²Iren at raja awene melaleg anyo sahaloho folug duhuk ulug wene lenggalduk halug de, iren enele seiale uruk kamuhup on aire ambiangma fano atuk karuhu fug.

¹³At TUHAN en andog leg ha waharukmu re, it enambol sombandoho re bupa uruk kamuhup.

¹⁴TUHAN nakni, Hat de Hebe homamne Humon welahenma re, niren Hat mot-hapuk kahe, Haren along ale neg duruk kahen ai fam, niren suni uruk kahe.