Read Ninia Yali MAZMUR 22 Bible Online

MAZMUR 22 - Ninia Yali bible

MAZMUR 22

¹Ap homi en suni wilibi folug enebe ambine uruk kweleg melal-enepuk an fahet, suni rusa o sekandilak deg kweleg uruk on suni anyo feneroho. Daud asuni anyo.

² Nakni Allah, nakni Allah, nunggwelug Haren o fotog neehen? An den hwi habihi famen de Hat hebe yatdoho neg wereg lit, an let-nabik waharuk kahen fug.

³Nakni Allah an den o nukohonam hwi hapuk kahi, famen de Hat hele eleg angge bok neg welahen. An de o hup angge somban uruk kahimen de, nendama mun hambuk ha fug ale neg napuk.

⁴Aireg famen de Hat neg de Raja Mun Eneg on, it ap homi Israel on en mot-hapuk on welahen.

⁵Nit nenambu-nenombasi en Hat fam neg enenda ebereg welatswa, it airoho enende ebereg wereg ma Haren it enahap wendat enepuk katihin.

⁶Ne, iren Hat hwi hapukmu re Haren lili feseruk katihin; ne it enenda Hat fam neg ebereg wereg ma it enenda hesilukwag ulug debeseruk katihin fug.

⁷Famen an de imbalo deg lahi, nebe ap on fug, ap homi humdoho en enalitno nabeheg, mabenap nobahakeg duruk.

⁸ It mundoho an inil neauk on en de enobam haro napuk, enunggul kwal duruk kwit enambilik en bulip napuk.

⁹ Iren uruk kwit de, “Aren enda TUHAN fam dipdeg lit welamag, TUHAN en at fahet ahayeg obam foruk kwit halug de, Aren ahap wendatmisi!” Ulug uruk.

¹⁰An nisinga ahummu en we Haren neg wilibi nobahaik waharihin, airoho nobahalug an nisinga ahoma yehelik duk fug angge bok welamag ulug nobaharihin.

¹¹An nebe endag-atihik huli en anggere an nebe aruhuk ale aire mundoho Hat henggikmu neg wereg, ne, an nisinga ahummu etma wereg lien angge re an nakni Allah re Hat hamu neg welahen.

¹²Anggin on ketia horog aik waharukmu re ap homi en eke let nabuk fug alereg ma anggere, yatma aik la fug.

¹³Wam banteng ai esan lohwaleg hag it naselei on en an maseroho kwelap nabik waharuk; ne banteng maro on o Basan etma on hagdoho iren an hwililip nabik waharuk.

¹⁴Iren de enambilik ele aroho an wereg ma waharuk singa en ele kouwaril noruk kwit di on su on abit kululung bil-esauk anyo hagdoho duruk.

¹⁵Ik mundoho wambulug oholuk neg atuk hag, an nowag etmano mundoho nomanggen fam en og-heheg lauk, nendama re hendali weraho angge nunum nunum eleg atuk hagdoho napuk.

¹⁶Nanggolobag elma[13] re woliom hagdoho mun kelog disi, nambilik anggen de nelanglang fam dopnoreg. TUHAN nakni, an de ap wareg on hagdoho, Haren kwenang ahe emberimmu nobaharihin.

¹⁷An de ap siag duruk on esan lohwaleg angge waharuk kwit mug-neauk; Mene esan lohwaleg angge en duruk hagdoho iren an hwililipdoho kwelabe nobahalug, nenggik neyog mel foroho kwelapuk.[14]

¹⁸An nowag mundoho re wenahaki ha alereg; it naselei on mundoho en de inil kwelaboho lit wereg angge hagdoho neg an kumu napuk kwit wereg.

¹⁹ Iren de an nasum etmano yohwan deheg, nasum dagma on bekit wan-duruk kahi on anyo hwelaul ulug helep anggen wal-heheg duruk.

²⁰Famen de TUHAN nakni, Hat neg de yatma aik la fug, an nomamne re Haren neg og-nutuk kahenma, Hat hebe watlug let-nabik ma.

²¹An noluk su karog ambiangma en ohwaloho nobahain; suwe siomayo enggik ahap en hamboregman hag an nahap wendaroho nobahain.

²²Banteng andimuk ambiangma en inim, singa ambilik men inim, An den duk ale eke wereg fug mu,[15] an lole nobahain;

²³ Haren duruk kahen ale etma re an nori fam dindil-esauk karuhuk; ne it Hat homaliki kabogdeg ma etmano en an den Hat mot-hapuk karuhuk.

²⁴Yaho hit ap homi wene melaleg furebelug duruk kahep on At neg mot-diek! Hit Yakub ambiangma henap mundoho en At neg leho feiyek. Hit Israel en ondoho lahep on mundoho At apma henelenggen dimirebelug apne wakiek!

²⁵Aren de ap homi enebe siag-biagdoho wereg on fahet sebeleg hag boruk fug, ne iren ouk anggoloroho hauk on etma fahet maben hag boruk eleg. Aren de ap homi aireg on weregman anduhun hwareroho lauk fug, ite iren let-nenebin ulug At fam hweag-utuk halug de esanggo holduk.

²⁶Haren di ale su ale duruk katihin on etma fahet, it ap homi Hat homaliki enebe kabogdeg on enesahalimu en an den hat mot-hapuk karuhuk. It ap homi Hat hele hole folug duruk on inil hanim, an den wam waroho yal-huruhuk ulug abug irihik on anyo waroho og-huruhuk.

²⁷It ap omi enenggik eleg de enahummu mun homoroho neg nahup; ne it ap homi TUHAN akit waharuk on en de at mot-duruk kamuhup. Hit henebe mundoho-mundoho etma henobam mun fanoroho neg welamuhup lamag!

²⁸At TUHAN neg along wereg lit, Aren ap homi enunggul unuk mundoho melal-enepukmu re,

²⁹it ap homi enunggul unuk mundoho en de TUHAN fam enenda ebet aruhu mu sombandoho nikangge At akit waharuk kamuhup, it di enunggul unuk su enunggul unuk mundoho en at apma sebe ulug apne wauk kamuhup.

³⁰It di ap su ap yain-kain wereg on ai en oho At apma neg[16] sebe ik watlug apne wauk kamuhup; it ap homi enonggwareg en enoluk eke nim welamul ulug da fug alereg on etma mundoho en oho At apma neg sebe ulug apne wauk kamuhup.

³¹It fobik endag-amuhup deg welamuhup on etman oho TUHAN obam neg kabog-duruk kwit, at obahet deg ale re dindil-dindil neg uruk kwit welamuhup.

³²Ne, it enunggul unuk eke fobik endag-amuhup on en oho re, At TUHAN en omaliki enahap wendat-enepsi ulug fag-duruk kamuhup.