Read Ninia Yali MAZMUR 25 Bible Online

MAZMUR 25 - Ninia Yali bible

MAZMUR 25

¹Daud Asuni anyo. TUHAN nakni, we Hat hobam neg an den somban lahabe feik waharuk kahi.

²Nakni Allah, an de we Hat hobam neg nenda demdoho boruk kahi! It ap homi naselei on etman kuk saloho belap napuk kwit, nenggaliap nobahaukwag ulug embesouk fug.

³It ap homi en Hat hobam enele sali uruk on de enenggali amuhup, famen de Hat hobam enenda dip-deberuk on de enendama siaho fesehup fug.

⁴TUHAN nakni, Hat henda boruk kahen ale ai an nobam unug nimin, an den duhuk ale ai Haren ebename fein.

⁵An nebe Hat henda boruk kahen aleroho neg welamag ulug, hweag-nereheg, mamul-nabeheg din. Allah an nahap wendat napuk kahen on de Hat neg deg lahenma re, an den Hat hobam neg nenda ebereg welahi.

⁶TUHAN nakni, Haren kirim-keram henda fano aheg, henda hundig nabeheg, dirihin on anyo unug nimin.

⁷An nebe sauwereg li nasiag dirihik on mel kwasikdoho dirihik on mel Haren elehapdoho nobahain; Hat henda fano aheg, henda hundig nabeheg, duruk kahen ai fam an Henda wenggel-neakiyug.

⁸At TUHAN aire fanoreg lit katukdoho neg duruk on deg ma re, ap homi en kwe enenda nong-hong uruk en duruk on fam oho re kwe hweag-esauk.

⁹It ap homi enenda hwerieg on de TUHAN en hwaloho feseik lauk, ne iren de At endama boruk ale duruk kamag ulug mamul-enepuk.

¹⁰It ap homi en lahe At TUHAN en abug wene hweag-esai on fam inim, At Awene melaleg fam inim, holoho neg duruk halug de, Aren oho enda hundig fam dipdoho neg debeseruk.

¹¹TUHAN nakni, an nasiag dirihik on de mun humdeg ma re, Haren hele sali wat-nitihin aleroho neg nasiag elehapdoho nobahain.

¹²At TUHAN en de it ap homi At awene melaleg furebelug duruk on neg, kwe it lahup kwe ulug hweag-esauk.

¹³It enebe re enangge di angge su angge mundoho wereg ma neg welamuhup, ne it enomaliki, enombasi mel, de enanggwenang it enengge atsi on ai seneg lit neg welamuhup.

¹⁴At TUHAN aire it ap homi At ele holoho neg duruk on ai enere, Aren enda wenggelduk alere it enobam ename feseruk.

¹⁵An di angge su angge ambiangma aik la hag ale atuk mu Aren neg nahap wendat napuk en de, nil de At TUHAN fam neg loureg lit welahi.

¹⁶An de namu wereg lit anggilik-anggoloroho welahireg de, Hat hil fu nealug henda neakin.

¹⁷Nendama firatuk on de mun hum atuk mu re, nenda fit neg atuk en duruk kahi on ai Haren fiselaroho nobahain.

¹⁸Nenda firatuk en duruk kahi on ai mel, anggin fanggin hauk kahi on etma mel, Haren neg fubi nobahakeg, ne nasiag abirangge elehapdoho nobahakeg, din.

¹⁹An naselei on mun hum alereg angge furin; iren de an mundoho enalitno napuk angge ai.

²⁰An de Hat hobam neg nalong baleg welahimu re an nenggali hihi hano re, an kahal nusug wereg lit nahap wendat nabin.

²¹An den Hat fam neg nenda ebereg wereg lahimu re, we Hat henda fano en enepuk kahen on ai nim Haren bekitdoho neg duruk kahen on ai fam nim en an kahal nusug welamag.

²²Nakni Allah, it Hat homaliki enenda sug-sagdoho wereg ma etma Haren neg fiselaroho enobahain.