Read Ninia Yali MAZMUR 26 Bible Online

MAZMUR 26 - Ninia Yali bible

MAZMUR 26

¹Daud Asuni. Nakni TUHAN, ande nenda mun bekitdoho deg lit neg welahimu re, Haren katukdoho neg nobahain. Ande TUHAN hobam neg nenda mundoho ebereg wereg lit de, dorangge ulug oho nenda biren-baren uruk fug.

²TUHAN nakni, an nebe deg lahi ale Haren fik furoho kumi neeheg, ne an nobabut bal neeheg, din; an nambono hauk kahi ale mel, nendama wenggelduk kahi ale mel filinggoho kumu neakin.

³Ande Haren Henda hundig napuk kahen ale ai hundig wenggel halug de, Hat hobam dipdoho neg[18] duruk kwit welahi.

⁴Ande ap enele sali on mel kabog-duruk ale etma nerim deg lahi, it ap enele en hwenaroho uruk on nim mangmangno duruk alere oho nerim napuk.

⁵It ap homi siag duruk on en kabog-dulug durukmu etma mun nerim esauk kahi, ne it siag duruk on enebe re anden ahaye-enepuk kahi.

⁶An siag duruk kahi fug ulug enegdoho nenggik ho dalug de, suni Hat dang deg suni il,

⁷ne Haren nik ale fog deg ale duruk kahen on etma fag dil, Hat hobahet di on su on waroho yaldukmu mezbah anyo maseroho walingguruk kahi.

⁸TUHAN nakni, ande Hat hebe mun handungdang wereg lit wereg lahenma, Hat Hobam wirigmu etma nenda hundig duruk kahi, nakni.

⁹Ande it ap homi siag duruk on nim ambine nowaruk fug, ne it ap homi enamep belapni etma nim naheime og-nabuk fug.

¹⁰It ap homi etma re hundig-handig siag neg duruk, ne di angge su angge enenggik apmane hwelakoho neg duruk kwit wereg.

¹¹Famen de an neg de nenda mun fano fam wereg lahimu re, Henda hundig nealug de fiselaroho nobahain.

¹²Airoho nobahakun fam de di on su on etma fam en an nakol eleg angge nambong seroho welaheg, ne it ap homi Hat homaliki on enebe humdoho kabog degman anden TUHAN mot-deheg, duruk karuhuk.