Read Ninia Yali MAZMUR 27 Bible Online

MAZMUR 27 - Ninia Yali bible

MAZMUR 27

¹Daud Asuni. TUHAN aire an ombogbag nabeheg, nahap wendat nabeheg, duruk on deg ma re, an den nakol duruk kahi angge eke wereg fug. TUHAN aire an nalong baleg welamag ulug nahembir angge deg ma re, an nebe lohon elek-felek uruk kahi fug.

²It ap homi enolok on en an nowarukoho housal-nabik waharuk famen de, irat eneyog dungdoho wat-dauk.

³It ap homi enebe esan humon lohwaloho an hukdoho kwelabe nobaharuk famen ohore; an lohon nakol duruk karuhuk fug. It ap homi en an nowarukoho lit weim sinalduk famen ohore, an de nendama lohon yehelik duk fug angge[19] welaruhuk.

⁴TUHAN nakni, we indip misig ale neg hobam heng uruk kahi; ne an den heng uruk kahi on ai ebere su: Nebe li mundoho etma Hat Hobam wirigmu etma wereg lit TUHAN enda fano en debeseruk ale etma neg heeheg, ne TUHAN en melal-nabeheg, durukmu etma welale boruk kahi.

⁵An nobam anggin fanggin napukmu re we At TUHAN en neg nalong baloho fahat nusug; Aren de At obam wirigmu etma heraho nobahaik kulug, helep dom on anyo emberimmu hamboko nobahakeg napuk.

⁶An ketiare it naselei on maseroho naluluk kwe wereg on anyo fam en nalong atuk kahi; Ai fam de nenda mun nahayeg fam an den Hat dang hapuk kwit wam waroho Hobam olma etman og-hirik kuruk karuhuk. An den suni eheg, At TUHAN mot-deheg, duruk karuhuk.

⁷TUHAN nakni, an den Hat hobam nele hwi hapuk halug de hesanggo hol-nabin; ne an henda nealug de onggo hweag-nutuk kamin.

⁸Haren an nobam uruk kwit[20] de, “Watlug An napne wauk kamin,” ulug urukmu re, an den onggo uruk kwit de, “TUHAN nakni, an de folo-folo neg waikoho lahi;

⁹an fam en Hat hebe herag am fug.” Uruk kahi. Haren neg an let-napuk kahenma re, an Hamingming angge su holok nobam feheg, herim en nobahakeg, duk fug. Nakni Allah nahap wendat napuk kahen on, Haren an hesama hwik neeheg, heila nobahakeg, duk fug.

¹⁰An nisinga, nakni mel en nobahalug lauk famen de; At Allah en neg an hwal-napuk kwit wereg.

¹¹TUHAN nakni, an naselei on de enebe humdeg ma re, Hat henda an den dukwag boruk kahen ale unug nereheg, kwe bekit on fam hwaloho nobahaik laheg, din.

¹²It naselei on enelemag en enele seiale fam an nowarukoho dik waharuk on ai enenggikmu og-esa fug.

¹³An nebe o kwenangma suma noluk wereg kweleg, At TUHAN enda fano en debeseruk on anyo nebe fam hahuk ulug nendama dik-demdoho boruk kahi.

¹⁴TUHAN fam neg henenda ebereg welamek, henendama hambuk dalug elek duk fug angge welamek; Yu, we TUHAN fam neg henenda ebereg lamuk!