Read Ninia Yali MAZMUR 28 Bible Online

MAZMUR 28 - Ninia Yali bible

MAZMUR 28

¹Daud Asuni. TUHAN nakni, we Hat hobam neg an den nele hwi hapuk kahi; Hat de an nibil atuk on welahenma re, an nele uruk kahi on ai hesanggo hol nabin. Ne, Hat hele uk eleg angge hape moroho wereg li em de, an de bohwe ele ap homi sal-enepukmu habulig on anyo fam wambik lauk on hag deg lahi.

²An let-nabin ulug hobam heng waharuk kwit nele hum ngai duruk halug oho, ne Hat Hobam mun eneg on anyo wirig fil etma nenggik lahabe folug wereg halug oho, Haren hesanggo hol nabin.

³An de it ap homi wene sahale folug duruk on nim seberoho fun-fan nea fug, ite it ap siag duruk on mel elehap nobahauk fug; it enendama re mun filik deg lien de enambilik fam neg enele sakoroho uruk.

⁴ It enobabut airoho duruk ai fam unggum og-esakin, it enesiag duruk ai fam anggin on enobam fesein. It enobabut duru ale eta higitdoho unggum enobam feseiyug; ne enesiag duruk ale eta ilitdoho unggum og-esakiyug.

⁵At TUHAN en disi ale anyo fahet iren along boruk fug, ne Aren di ale su ale debesi on fahet oho leho foruk fug. Ai fam de Aren it enobam unggum feselug de it enebe mundoho-mundoho elehap debesehu.

⁶An den TUHAN fam heng uruk kahi on Aren esanggo holdukmu re, TUHAN neg motdeg motdeg welamag.

⁷TUHAN aire an nalong bal-nabeheg, nibil aheg, duruk on wereg. Ne an den At fam nenda demdoho boruk kahi. Aren de an let nabeheg, nendama nahayehap kwelabe ale neg nobahakeg, duruk; an den suni At dang duruk suni neg uruk kahi.

⁸At TUHAN en de it ap homi At omaliki on fam enomamne og-eseheg, Aren raja momaleg on anyo ibil atlug ahap wendareheg, duruk.

⁹TUHAN nakni, ap homi Hat homaliki on etma enahap wendat-enebeheg, it ap homi Hat honggwareg en on etma enobam fanoap debeseheg, din. Hat hebe it enobahet gembala wereg hagdoho atlug; li mundoho-mundoho etma Haren neg kahal-enusug lit welamin.