Read Ninia Yali MAZMUR 29 Bible Online

MAZMUR 29 - Ninia Yali bible

MAZMUR 29

¹ Daud Asuni. Hit bohol fam etma henoluk welahep on yei, TUHAN mot-diek, At andungdang wereg ale fahet inim, omamne wereg ale fahet inim mot-diek.

²At TUHAN unuk mun ebe on ai mot-diek At obahet duruk kwit sum wan duruk on[21] etma wandoho apne wakiek.

³Allah mun andungdang wereg on anyo en ik laut emberim fam sipuk duruk; At elere ik yenggeleg on ahum emberim fam etman ngururuk.

⁴TUHAN ele aire mun alongdoho omamne weregma, enesanggo hol hauk.

⁵At TUHAN ele en de e wilibig on unggul waroho yin hun esauk, o Libanon en e sin omano opuk heheg hwik esauk.

⁶Dom Libanon dom anyo re Aren sapi omalik holombog-holombog angge duruk hagdoho deberuk; Dom Siryon anyo re no banteng omalik en hagdoho hemeg-hemeg angge deberuk.

⁷At TUHAN ele en de, oweal lepengdoho salik waharuk.

⁸TUHAN ele en de o lei omano elek felek esauk; TUHAN en de o Kades lei anyo kwel-fel esauk.

⁹TUHAN ele en de e beranggan wilibig on omano youk-fouk esauk[22] no rusa omalik ahumu deberuk, ne di enggela su enggela ohweimu wereg on etmano loloho belapuk; Etma airoho duruk kweleg de, At TUHAN omaliki obam wirigmu etmano en enele uruk kwit de, “TUHAN neg motdeg welamag!” Uruk.

¹⁰Ik fu leheruk on oho re At TUHAN apma neg wereg, At ebere raja mundoho-mundoho fahet along wereg lit unduhuk wereg.

¹¹We At TUHAN en neg omaliki enomamne og-eseheg, it enobam finik-fanoroho debeseheg, duruk kamag.