Read Ninia Yali MAZMUR 30 Bible Online

MAZMUR 30 - Ninia Yali bible

MAZMUR 30

¹Daud Asuni. Allah Obam wirig anyo sok husuruk kwit suni uruk on.

²TUHAN nakni, it ap homi an naselei on en an kuk saloho belap-nabukwag ulug nobahauk eleg angge, Haren an nahap wendare nobaharihin mu re, an den hat mot-hapuk kahi.

³TUHAN Allah nakni, an den let-nabin ulug Hat hobam hwi hapukmu re, Haren an hilinggi nobaharuk kahen.

⁴Ap homi waratlug laukmu etmano en Haren neg an ohwaloho nobaharuk kahen, it ap homi wareg on etmano enesahalimu en Haren neg nolukap nobaharuk kahen.

⁵Yaho Hit At omaliki At obam dipdoho neg duruk kahep on, TUHAN obahet suni motdeg suni neg wilibiek, ne At Mun Eneg wereg on ai fam dang neg duruk kamek.

⁶At TUHAN en de we elamna fahet olok atuk famen de, Aren enda fano atlug enepuk kwit wereg on aire nenoluk welamuhuk huli etma nenepuk kwit neg welaruhu. O hup angge re an oba yatuk kahi; famen de o seleg duruk kwit de nahayehap nobahaik waharuk.

⁷An nakol eleg angge wereg li em an den uruk kwit de, “An de nalong elehap nobahaik wam fug alereg,” uruk kahi.

⁸Nakni TUHAN Haren an fano ale neg nobaharuk kahen, ne an de dom omamne on hagdoho nobaharuk kahen. Famen de Haren airoho nobahalug Hat hebe herag atuk kahenma re, an anyo nenda nakol atuk.

⁹Nakni TUHAN we Hat hobam neg an den hwi hapuk kahi, we TUHAN hobam neg an den heng hapuk kahi.

¹⁰“An nebe waratlug ap homi wareg on sal-enepukmu etma wambik lahi ha man, ai atuk ai fam Hat hobahet ambiangma keroho am alereg? Ap homi wareg on en Hat mot-habuk alereg a? ne Haren dipdoho neg duruk kwit welahen ale etma fahet fag-dik la alereg a? Mun eleg.

¹¹TUHAN nakni, nele hesanggo hol neakin, TUHAN an nebe let-neakin!”

¹²An fong watuk kahi on anyo re Haren ahamdoho re nahayeg en yunggul howag ulug nobaharihin, ne, haren de an norohole hesiloho welahi on anyo oko wauihindeg de, an nobam nahayeg humon kwelabe nobaharihin.

¹³Ai fam de an den nele eleg angge bok welatmin fug; Nakni TUHAN Allah, we Hat hobahet neg suni uruk kwit mot-hapuk katmin. Ne li mundoho-mundoho etma Hat neg dang hapuk kwit welaruhuk!