Read Ninia Yali MAZMUR 31 Bible Online

MAZMUR 31 - Ninia Yali bible

MAZMUR 31

¹Suni wilibi folug ambine urukmu melal-enepuk on fahet, Daud asuni.

²TUHAN nakni, an de Hat hobam neg nalong baleg welahimu re, ap homi en an nendama oukap kwelabe nobahaukwag ulug o fotog nea fug. Haren de mun katukdoho neg duruk kahen anyo fam an nahap wendat-nabin.

³an nele hesanggo hol-nealug de folo-foloroho neg loloho nobahain. Hat hebe re an nalong baloho herag atuk mu, dom helep il wereg on hagdoho amin, etman an nahap wendareg welamag ulug an fahet alhop omamne on hag amin.

⁴Demdoho Hat de an nobahet dom helep il wereg on hag, ne alhop omamne on hag atuk kahen! Hat hele sali wat-nitihin ale higitdoho melal-naplug nobahaik lauk kamin.

⁵An de Hat fam neg nalong baleg werelahimu re, Ap homi en an nobahet sabu yep deberuk on fam etman loloho wilibi nobaharuk kamin.

⁶ We Hat henggik fam neg an nebe mundoho og-hutuk kahi; Nakni TUHAN Allah mun katukdoho neg duruk kwit welahen on, we haren neg an fiselaroho wilibi nobaharuk kahen.

⁷Ap homi kembu apne wauk on de Haren herim enusug lahen; famen de an neg de TUHAN Hat hobam neg nenda dipdeg welahi.

⁸Haren henda hundig nusug lit neg welahenma re, an namoldo en deheg, nahayeg deheg, duruk kahi. We Haren neg an nobam anggin-fanggin hauk kahi ale mel, anggoloroho welahi ale mel etma funobaharuk kahen.

⁹It ap homi naselei on en sabu hetdoho og-naplug lowag ulug fotog neauk kahen fug, ite an wene di on su on nobam eleg angge koloroho lauk kamag ulug neg nobaharuk kahen.

¹⁰TUHAN nakni, an nebe mun anggoloroho welahimu re Henda neakin. Noba neg yatuk men de nil mundoho ouk anggolo hauk kahi, nebe nim nahut aeg nim de we kolo kwe fifa uruk.

¹¹Naouk hauk kwit neg weregman li noluk welam on etano mundoho eleg aik lauk; di tahun su tahun etano re nelma sat hoporoho neg weregman eleg aik lauk. An nasiag dirihik on etmano fam de an nomamne mundoho eleg aik lauk, nowag mundoho oho re mun serabi ko atuk.

¹²It ap homi naselei on inil hanim de an ap sabu hetdeg on hag atuk kahi, it nori o misig kwe eraroho welahe on famen oho airoho neg deg lahi. Ap homi an nombali on etmano en an inil nealug de youk lauk, ne kobokwema sal-kwal ulug ohore linggik-longgo uruk.

¹³An de ap homi enebe mundoho waratuk mu enepeleg atuk on hag atuk kahi, ne di angge su angge hwik-esalug ebet atuk fug on hag atuk kahi.

¹⁴Di kwe su kwe mundoho namelmel ale neg deg; it naselei on en enele ngul-ngul ale uruk on nesanggo holduk kahi. Ne, iren de enele misig seberoho maho folug an nowaruhuk ulug nabug balduk.

¹⁵Famen de TUHAN nakni, Hat de an nakni Allah at welahenma, an de Hat hobam neg ebet husug lit welahi.

¹⁶Haren neg an hundig hwal-napuk kwit welahen; it ap homi an naselei on etma fam en nim, ne it an siko-muko neg napuk on etma fam en nim nahap wendat nabin.

¹⁷Hat henda hundig en an nahap wendat nabin; Haren an hamingming angge su fahet hendama hahayeg habukwag.

¹⁸TUHAN nakni, an den de Hat hobam neg nele hwi hapuk kahimu re; an nenggali amag ulug nobahauk fug. We it ap siag duruk on neg de enenggali howag, ne enebe re ling long ap homi waratlug laukmu etma wambik lowag.

¹⁹Ap homi bekitdoho duruk on fahet enawonog fam enalitno enepuk on etma, enele seiale uruk on ai enembilik ele lare fesein.

²⁰Ap homi Hat hele holoho duruk on fahet Haren enebe fano ale neg debeseruk karuhuk ulug fouk deberihin on aire, mun sigdoho deg ma hauk kahi. Ap homi Hat hobam enalong baleg wereg on fahet Haren fano ale debeseruk neg kahen aire, ap homi humdoho en inil hauk.

²¹Ap homi siag duruk on en enanggelem atlug durukmu re, Hat hawekahan apma sebel enusug lahen. It ena weim on en enobam fug mu hekip esaukmu re, Haren it enalong baloho fahat-enusug lahen.

²²TUHAN Hat neg motdeg welahen! An maseroho kwelabe nobahalug nowarik kwik waharukmu At TUHAN en enda hundig napuk ale ai fahet de an den yande fog duruk kahi.

²³An nenda nong hong urukmu wereg lit de, An den TUHAN olohotma en hwik neasi au i, boruk kahi. Famen de an den At fam nele hwiroho hweag-utuk li em. Aren an nele irihik on anyo esanggo holsi.

²⁴Yaho hit ap homi At omaliki welahep on anyo At TUHAN fam neg henenda hundig beiyek. At TUHAN en de it ap homi At fam dipdoho duruk on de enalong baloho fahat enusug. Famen de ap homi siag duruk on de, hambuk ha fug angge mondabi unggum enobam feseruk.

²⁵Yaho, hit ap homi TUHAN fam henenda ebereg welahep on de, henenda hambuk dalug elek uk fug angge welamek!