Read Ninia Yali MAZMUR 32 Bible Online

MAZMUR 32 - Ninia Yali bible

MAZMUR 32

¹ Daud asuni. Mamul-enepuk suni. It ap homi enesiag elehapdoho feseheg, ne iren dahandoho duruk on anyo sebeloho feseheg, duruk on etma enahayeg hauk kamag.

²Ne, it ap homi en kwasikdoho duruk kweleg TUHAN en airoho disi on ulug wenaharuk eleg on mel, ne enambilik fam en seiale uruk eleg on mel etma enahayeg hauk kamag.

³An nasiag owan fag-duk eleg li re, nukoho hundig-handig nambiken ulug nenek yoba duruk men neg de nebe mun fililing il lauk kahi.

⁴TUHAN, hup hundig nukoho hundig de Haren an sebe neg neauk kahenma re, mo ahanhan en hagdoho nomamne mundoho eleg atuk.

⁵ Airoho deg en Hat hobam an nasiag fag-duruk kahi, an den dahandoho dirihik on etmano misig eke heraho foruk kahi fug. An den uruk kwit de Hat hobam fag-dimin ulug fag-durukmu re, Haren an nasiag etmano hapelehapdoho nobaharuk kahen.

⁶Ai halug de it ap homi wene melaleg fik-furebelug duruk on de, anggin on enobam aik waharuk halug de, somban uruk kamag. Airoho somban uruk fam ik fu waharuk hagdoho anggin enobam aik waharuk kwit de, it sebel enebuhu hayog.

⁷An nebe heraho nobaharukmu re we Hat neg welahen, an nebe nong hongdoho atlug wereg ma Haren neg fiselaroho nobaharuk kahen. Haren neg an nahap wendat napuk kahen ai fam de, an nahayeg en nawonog atuk kahi.

⁸At TUHAN en uruk kwit de, “Hat kwe lowag ulug an den neg hweag-hutuk karuhuk, ne hat hebere an den komo habeheg, melale hobahakeg duruk karuhuk.

⁹No kuda wenggelduk eleg on fam akni ahun ele holoho lowag ulug ambiangmangge ware feheg, kumbi lili feheg, duruk hag duk fug,” ulug isi.

¹⁰Ap homi siag duruk on de asingsing fasingsing humdoho enobam aik waharuk, famen de ap homi At obam neg enenda ebereg wereg on de, At enda hundig enepuk on anyo en along bal-enusug laruhu.

¹¹Yaho hit ap wene melaleg furebelug duruk henap, At TUHAN en duruk ale ai fam henahayeg hauk kamek. Ap homi henendaman mun bekitdoho neg duruk henap de henahayeg en henawonog atuk kamek!