Read Ninia Yali MAZMUR 33 Bible Online

MAZMUR 33 - Ninia Yali bible

MAZMUR 33

¹Yaho hit ap homi wene melaleg fik-furebelug duruk henap, At TUHAN en duruk ale etma fahet henahayeg en henanggiluk diek; It ap homi bekitdoho duruk on en aire airoho mit-mot dukwag ulug wereg.

²Henambinggong kecapi fam TUHAN dang diek, henasuni binggong watuk kwit wilibiek.

³At TUHAN obahet suni keron wilibiek, henambinggong kecapi mun fanik-fanoroho wareheg, henenda henahayeg fam anggiluk deheg diek!

⁴At TUHAN en de di ale su ale duruk on de mun dipdoho neg durukmu re, At TUHAN ele aire abirangge demdoho behe ha alereg.

⁵Aren de bekitdoho duruk on mel, katukdoho duruk on mel, ai neg de enda hundig deg; o kwenangma suma mundoho Aren enda hundig nenepuk on anyo en hoporeg wereg.

⁶At TUHAN ele fam amin isi halug bohol wal-atsi, mo, bigalem, sohwalanggen inim de At awene fam neg wal-disi.

⁷Ik laut fam yenggeleg on aire obale misigmu balurebesi; ik ahum yahamag deg on aire aren helahe baloho lare fesi.

⁸Ap homi mundoho o kwenangma suma wereg on en At TUHAN fam neg enakol boruk kamag; ne o di o su o wereg on en TUHAN neg along bolug leho foruk kamag.

⁹At ele isi fam de di angge su angge etma mundoho wal-atil lasi, Aren amek ulug melalsi fam de mundoho wereg atil lasi.

¹⁰At TUHAN en de it ap homi di enunggul unuk su enunggul unuk en duhuk ale ulug wene lenggalduk on anyo suhwiap deberuk; ne it enenda ahe laharukmu uruk ale anyo Aren elehap debeseruk.

¹¹Famen de At TUHAN en duhuk ulug lenggalsi on aire mundoho bogdeg welaruhu, diroho duhuk suroho duhuk ulug wenggeloho fesi on aire di li su li etma mundoho omamnereg welaruhu.

¹²It ap homi enunggul unuk enap eke en TUHAN Allah aire nit nenakni ulug fag-duruk on aire enahayeg hauk kamag, ne it ap homi Aren momaloho An nonggwareg nomaliki welamag ulug fesesi on aire enahayeg hauk kamag!

¹³TUHAN ebe bohol fam wereg lit il belap-nesa waharuk, ne Aren de ap homi mundoho anyo il nesauk.

¹⁴At ebe hwerieg wereg ma takhta fam etmano en, o kwenangma suma wereg on mundoho il loat enepuk.

¹⁵Aren neg ap homi mundoho enenda wal-enepsimu re, iren duruk ale etma mundoho At oluk deg neg.

¹⁶Ap raja re autsi tentara humdoho wereg fam along atuk fug, ne it ap sehen foroho on de it enonggwareg enomamne fam enahap wendareg wereg fug.

¹⁷Ap en nit nenalong amul ulug de kuda fam dip debouk fug alereg, At omamne humon wereg ai fam de ap homi enahap wendare fesouk fug alereg.

¹⁸It ap homi wene melaleg fik-furebelug duruk on mel, ne Aren enda nesowag ulug ebereg lit wereg on mel, de TUHAN en hwal-enepuk kwit wereg.

¹⁹Aren de waratuk on fam en enahap wendare feseruk, ne it nauk elegma obokdoho wereg li Aren neg nauk on og-esauk.

²⁰Ai fam niren TUHAN fam neg nenenda ebereg lit welamul, Aren neg nit let nenebeheg, ninili oko ninibil laheg, duruk.

²¹At fahet de niren nenahayeg duruk kamul, ne At unuk mun eneg wereg on ai fam neg nenenda demdoho boruk kamul.

²²TUHAN nenakni, niren Hat hobam neg nenenda ebereg welahema, Haren nit henda hundig nenepuk kwit neg welamuk!