Read Ninia Yali MAZMUR 34 Bible Online

MAZMUR 34 - Ninia Yali bible

MAZMUR 34

¹ At Daud hun Abimelekh olohotman ap ape morue on hag debesireg wereg en muko wilibi fousama lasireg isi suni, Daud asuni anyo.

²Di salim su salim an den TUHAN dang duruk kahi, ne hundig-handig bale fouk fug angge TUHAN mot-duruk kahi.

³At TUHAN en disi fam an nawonog hauk kahi, it ap enobam anggin-fanggindoho wereg on en ohore ai enesanggo hol halug enahayeg howag.

⁴An ninim seberoho At TUHAN ai neg leho foukohon, an ninim ambine At unuk neg lahabe foukohon manik.

⁵An den At TUHAN fam somban uruk kahimu re, Aren onggo hweag-nutuk, ne an mun namelmeldoho wereg ma aren neg fiselaroho nobaharuk.

⁶Ap homi anggilik anggolo hauk kwit wereg lit halug de At fam neg enenda ebereg wereg lit enahayeg hauk kamag. It enenggali am ale fahet indip eke wereg fug.

⁷Ap homi iren duk fug alereg on en TUHAN fam hwiruruk halug de, Aren enele holoho onggo hweag-esauk, ne it enebe anggolo hauk kwit wereg on ai oko feseruk.

⁸It ap homi wene melaleg fik-furebelug duruk on de TUHAN ayonggo malaikat omano en hwal-enepuk kwit wereg, it enebe nale nebuk ale atuk mu iren oko feseruk.

⁹ At TUHAN enda fano en debeseruk ale ai hit henemu domog en abut bal hakiek, it ap homi At fam enalong baloho wereg on de enahayeg boruk kamag.

¹⁰Yaho, it ap homi wene melaleg fik furebelug duruk on de maben atuk kamuhup fug anggere, hit ap homi TUHAN omaliki welahep on en de At TUHAN neg along bolug leho feiyek.

¹¹Wam singa re nauk on elegma obok hauk; famen de ap homi TUHAN apne wauk on halug de it enenggikmu maben aik lauk karuhu fug.

¹²Yaho nomaliki, henesanggo holiek, TUHAN along bolug leho foruk ale an den mamul henepmin.

¹³ Henebe henoluk yatdoho wereg lit, fano on neg hauk kwit welala henenda boruk kahep a?

¹⁴Henambilik fam en henele siag on wilibik wam fug, ne henele seiale uruk on ai fahet henahayeg deg lit uruk kam fug.

¹⁵Siag on aire ahayeroho yatmaap debelug de, henamururu fam seberoho welamul on ulug neg fahet duruk kamek.

¹⁶It wene melaleg fik-furoho duruk on de At TUHAN en fubi debeseruk, ne iren let nenebukwag ulug enele hwiroho lahapukmu At esanggo holduk.

¹⁷Famen de it ap homi siag duruk on de Aren obam haro doho fu esauk; ne it enebe waratuk halug de folo-folo enapelehe feseruk.

¹⁸It ap homi wene melaleg fik-furoho duruk on en TUHAN fam hweag-utuk halug de, Aren esanggo holduk, ne anggin-fanggin hauk on am en enahap wendaroho feseruk.

¹⁹At TUHAN de ap homi enenda doratlug wereg on fam horogma wereg, Aren de ap homi enenda sebe ulug wereg on enahap wendat-enepuk.

²⁰Ap homi fano duruk on fam de ouk-bouk humdoho hauk, famen de mundoho etma TUHAN en neg elehapdoho foruk.

²¹ It enebe re TUHAN en neg hwal-enepuk kwit wereg, it enowag fam en de dem misig oho eke somboruhu fug.

²²Ap siag duruk on de enesiag duruk on ai fam waramuhup, it ap homi wene melaleg furebelug duruk on fam enerim enepuk on etma re unggum enobam fesehu.

²³TUHAN en de At amingming angge enahap wendare feseruk; At obam enalong baloho wereg on de enobam unggum fesehup fug.