Read Ninia Yali MAZMUR 35 Bible Online

MAZMUR 35 - Ninia Yali bible

MAZMUR 35

¹Daud Asuni. TUHAN nakni, ap homi an ena — weimdoho nowarik waharuk on etma Haren hinim abiek; it ap homi an nim dog yabik waharuk on etma Haren enowarin.

²Haren de handog bei angge abung-abang deg on mel, we bekit deg on mel walug de, an let nabik ma.

³Haren habit mel, hanggisim mel walug de, it ap homi an mug naplug waharuk on etma hinim abiek.

⁴It ap homi an nebe nowatul ulug duruk on etma, enalong elehapdoho feheg, enenggali-ap debeheg dukwag. It ap homi an nabug enebe misig maho folug an na weim atuk on etma, enenda nong hong ulug somban howag.

⁵It aire hol en amungmung angge fi esauk hagdoho, Malaikat TUHAN etmano en muko yin hun esowag.

⁶Malaikat TUHAN en siko, kwe heikdoho ilibulin deg kwe etma lowag.

⁷Iren an sen napul ulug nobahet sabu yepdeheg, kwenang bohwe habuleheg, duruk etma re we alemaroho duruk.

⁸It enobam airoho atmisi eleg degman fetagdoho, it enebe elehap enebik wamag. It enonggwareg en yep deberuk on etma fam it enebe luhut aheg, sunggukdoho wambeheg, dulug enebe eleg amag.

⁹Airoho atuk ai fam At TUHAN fahet nahayeg duruk karuhuk, Aren neg an nahap wendat napukmu re nendama nahayeg boruk kahi.

¹⁰An nenda nebe mundoho abirangge fam nele uruk kwit de, “TUHAN Hat hinim ilit habuk on de eke wereg fug! Haren neg it enomamne eleg on it enomamne on enenggikmen deloho feseruk kahen, ne it enangge eleg on mel, anggoloroho wereg on mel, de it sebel-enusug wereg on etmano enenggikmen lole feseruk kahen.” Uruk kahi.

¹¹Enele seiale fam fag-duruk on inahasareg an inil napuk, an den mel ebe napeleg kweleg famen nobam fug mu hekip neauk.

¹²An den fano ale enepuk kahi on etmano re iren siag ale fam an nobahaik waharuk, an de ik ahummu obuk ulug wereg hagdoho an nenda mun firaha ma welahi.

¹³It enebe ouk deg li em de, an nenda hesilduk en de nasiburu na fug angge welahi; nunggul wambo ulug somban enobahet uruk kahi,

¹⁴Ap enori enamepsi mel, enori inim hundig on mel, enobahet somban uruk hagdoho duruk kahi. An nonggwareg nisinga fahet oba yag-enepuk kwit hagdoho, an nunggul wambo ulug enbahet oba yag-enepuk kahi.

¹⁵Famen de, an anggin deg li em de it enahayeg atuk, it enebe mu il lauk kwit an inil napuk. An enalitno nabukoho re eneyog heg-heg anggeril lauk.

¹⁶Ap eyog siag on de iren bulip-duruk, enolok fam an fu neauk.

¹⁷TUHAN nakni, ke huli abi, ke huli, Haren hil fu neauk kwit neg welatmihin? Iren an nowarukoho waharuk on ai fam en nahap wendat nabin, mene singa en hag dil waharuk on ai fam en an noluk ohwaloho nobahain.

¹⁸Ai fam an den it Homaliki humdoho kabogdeg on inil hanim, Hat dang-hapuk karuhuk. It enebe kabog-debelug wereg ma etman Hat neg mot-hapuk karuhuk.

¹⁹ Wene indip eleg kweleg it ap homi etman an ena weim nobahalug duruk enap ai en, an ap doron hagdoho lal-fal neowag ulug embesouk fug. Wene ebe enapeleg kweleg an enerim napuk enap etman kuk sal-nabukwag ulug embesouk fug.

²⁰Ite enele sako fam de uruk fug, it ap homi enebe seberoho kain wereg on fam lal-enebuhuk ale ulug neg wene melalduk

²¹Iren de an nobam enele hum ngairuruk kwit de, Haren dirihin alere nit de mundoho heauhuk uruk.

²²Famen de TUHAN nakni, we Haren neg hil mundoho neauihin; TUHAN hele eleg angge bok welam fug, ne an welahimu en yarapdoho la fug nakni.

²³An nakni TUHAN Allah, hebe inatlug an nawene su fahet nibil amin, an let nabin nakni!

²⁴Nakni TUHAN Allah Haren de mun katukdoho neg duruk kahenma re, Hat hebe an nibil atlug nili og-nabin, it naselei on en kuk sal nabukwag ulug embesouk fug.

²⁵It enendama en uruk kwit, “At ebe anyo niren elehap debehe ai eiyale. Nit nenenda boruk kahe ale anyo mundoho aha ai!” boukwag ulug embesouk fug.

²⁶We an nobam anggindoho wereg ma inil neauk on en de, enenda nong hong ulug enenggali amag. An nil hanim it enawonog atuk on etmano, enunuk sebeloho folug enenggali ware fesoukwag.

²⁷Ap homi an ap demdoho on ulug nobaharuk li em inil nealug, enahayeg en anggiluk dukwag. Iren hundig-handig uruk kwit, “Demdoho TUHAN aire mun andung-dang wereg on! Aren de amingming angge ahap wendareg welamag ulug ai ahayeg deg!” Uruk kamag.

²⁸Ai fam an den de Haren katukdoho neg duruk kahen ale etmano fahet, fag-dik laheg, ne nukoho hunduko Hat neg mot-hapuk kwit welaheg, duruk karuhuk.