Read Ninia Yali MAZMUR 36 Bible Online

MAZMUR 36 - Ninia Yali bible

MAZMUR 36

¹Ap homi en suni wilibi folug enebe ambine urukmu melal-enepuk on fahet, TUHAN amingming angge Daud anyo asuni.

² Ap homi siag neg duruk on enenda ilonggoma en de siag anyo ele uruk, at ai en de dik-demdoho Allah fam eke akol boruk fug.

³Aren boruk kwit de an nebere nalong nahun welahi boruk kwit de, at asiag duruk on anyo endama wenggel-atuk fug, ne asiag fahet erim duruk eleg.

⁴Aren de fano on mel enda wenggeleg on mel de duruk eleg, at ele matuk on etma re mun hape on neg uruk kwit seiale on en neg hoporoho uruk.

⁵At ebe nohorukmu etmano en de siag duhuk ale ulug wenggelduk; aren duruk ale re fano hag on eke wereg fug, ne siag on de nerim ulug embeseruk fug.

⁶TUHAN nakni, Haren henda hundig nenepuk kahen on aire bohol yit-yatdeg wereg ai hag deg, ne Haren dipdoho neg nenepuk kahen on aire yatdoho anggulog huli etma deg.

⁷Haren fano on nenepuk kahen alere dom yaron ologdoho lahabeg etma hag deg, ne Haren katukdoho neg duruk kahen on aire ik yenggeleg on ahum yatdeg etma hagdoho deg; ap homi inim di angge su angge loboruruk angge nim mundoho re Haren neg hwal-enepuk kahen.

⁸Nakni Allah, Haren henda hundig nenepuk kahen on aire onggo hum angge hag deg ma, ap homi en de Hat hawekahan apma herag aik kurukmu enalong baleg wereg.

⁹Hat hobam olman nauk angge mun hum hamdoho og-esauk kahen on etma fam it mundoho homo debeseruk; ne enahaik de Hat hahaik wirig atuk on fam en il habub angge og-esauk kahen on etma fam homo debeseruk.

¹⁰Ap homi di angge su angge enoluk wereg on ai enoluk indip de we Hat neg welahen, Hat haseleg fam neg de niren seleg deg on hehe ha alereg.

¹¹Ap homi Hat enoluk deg on halug de Haren henda enepuk neg kamuk, ne it enenda bekitdoho neg duruk on etma re fano ale neg debeseruk kamuk.

¹²It ap homi enawonog on en an mug neowag ulug embesouk fug, ite ap homi siag duruk on en siloho monde nobahaukwag ulug embesouk fug.

¹³Fu esakin, ap homi siag duruk on de mundoho ying-ahesa angge, mundoho waroho bou ehesareg de enoluk inam fug ale aha.