Read Ninia Yali MAZMUR 37 Bible Online

MAZMUR 37 - Ninia Yali bible

MAZMUR 37

¹At Daud en isi wene.

²Ap homi siag duruk on fahet henahummu henolok dulug duk fug, ap homi en kwasikdoho duruk on fahet henobam siagma debesouk fug.

³TUHAN fam henenda demdoho boruk kwit, fano on neg duruk kamek. Henobam henanggwenang og-hesasimu etma bok wereg lit dipdoho neg duruk kamek.

⁴Hiren At TUHAN fam neg henahayegdoho welamul on ulug heraruruk halug, Aren hit henenda boruk ale etano higitdoho henobaharuk karuhu.

⁵Hit henebe mundoho TUHAN neg og-utlug de, At obam neg henenda ebereg welamek, ne Aren hit let-henepuk karuhu.

⁶Ne, hiren dipdoho neg duruk kamuhup on aire Aren o seleg hagdoho henobaharuk karuhu, ne hit henenda il wareg lit duruk kamuhup on aire o nukoho deg etano hagdoho henobaharuk karuhu.

⁷Hit henenda elek felek uk fug angge At TUHAN nangno hauk kamek, ne Aren owan duk eleg li em de bok wereg lit nangno hauk kamuk. Ap homi en durukmu ambiangma fano aik lauk on fahet henenda firuk fug, ite enambilik men seiale wene uruk on fahet airoho duk fug.

⁸Hit henendama ahe-fahe ulug henolok duk fug, aire hit alemat henebikoho duruk anggere.

⁹Ap homi siag duruk on de mundoho eleho fesehu, famen de ap homi TUHAN obam neg enenda ebereg lit wereg on de kwenang ai iren seneg lit neg welamuhup.

¹⁰Ap homi siag duruk on de folo-folo eleg amuhupmu, it enebe hera-esauk men de elegma esahup lit deg.

¹¹ Ap homi enenda sebele fahat dalug duruk on neg de o kwenang ai seneg lamuhup, ne di angge su angge mun ha fugdoho wereg ma nauk kwit wauk kwit welamuhup.

¹²Ap siag duruk on de ap fano duruk on fam siag ale debesoul ulug wene balduk, ne inil enerim fam fu esauk.

¹³Famen de ap siag duruk on ai enebe mundoho eleg aik lahup li em At mundoho oluk deg ma re, At TUHAN en de it ap airoho duruk on ai unda yag-enepuk kwit wereg.

¹⁴Ap siag duruk on en de ap homi enengge eleg on mel, anggin fanggindoho wereg on mel enowareheg, ap homi enebe fanik-fanoroho wereg on etmano seneko enowareheg, dul ulug de enenggarog fangdeheg, enandog leheik laheg, duruk.

¹⁵Famen de ap siag duruk on de it enonggwareg enenggarog en dal dahup, ne it enesehen de fulog esahup.

¹⁶Ap siag duruk on en enangge hum hamdoho wereg ma duruk on ai maben hag, famen de ap fano neg duruk on en enangge dorangge wereg ma duruk on ai neg de mun along deg.

¹⁷Ap siag duruk on enalong wereg lit duruk on aire At TUHAN en neg si esahu, famen de ap fano duruk on de Aren enalong bal-enusug laruhu.

¹⁸Ap wene melaleg fik furebelug duruk on de At TUHAN en hwal-enepuk kwit wereg, it enonggwareg enebinggi angge aire mundoho-mundoho etma eleg aik lahu fug.

¹⁹It enebe anggoloreg li em de it enobam anggin hauk kamuhup fug, ne it enangge nauk on eleg li em ohore mun higitdoho neg wereg laruhu.

²⁰Famen de ap siag duruk on de mundoho eleg amuhup, it TUHAN aselei on etma re o walma owil angge loloho eleg atuk hag, it enebe hobu anggelegma eleg atlug longgo ik lahup.

²¹Ap siag duruk on de ori enengge fobik obalma og-huruhuk en ulug wil lauk kwit en de owag oko enonggwareg og-esauk fug, famen de ap fano on de enenda sako fam og-esauk.

²²Ap homi TUHAN en fanoap debeseruk on de o kwenang etma seneg lamuhup, famen de ap homi Aren wip debeseruk on de muko wilibi fesehu.

²³At TUHAN en de ap homi kwe lauk kam alereg on fam melaloho feseik lauk, ap homi it enebe wereg lit At endama ahayeg boruk ale neg deberuk on de enomamneap debeseruk.

²⁴TUHAN en enggik seneg wereg ma atlug de, ap ai bule wat-dahu famen ohore ebene yebil humdoho waruhu fug.

²⁵An nebe sauwe welatihik li en ketia sobal atihik angge, ap fano ale neg duruk on ai TUHAN en lin-esasi on eke wereg fug, ite it enomaliki enombasi en heng-heng angge on atswa ale eke wereg fug.

²⁶Aren de hundig-hundig og-eseheg, ap en fobik owag og-nesahup on ulug og-esauk anyo hag og-eseheg, duruk karuhu, ne it enomaliki re at obam fanoap angge atuk karuhu.

²⁷Siag on duruk ale ai embeselug fano ale neg duruk kamuhup halug, li mundoho etma fam hit henambiangma ondoho on o kwenang etma fam neg welamuhup.

²⁸At TUHAN en de ap homi en fano on deheg, katukdoho duruk ale neg deheg, duruk ale ai fahet neg enda hundig boruk, ap At fam neg dipdoho duruk kwit wereg on de danealeg atlug welamag ulug embeseruk fug. Aren de li mundoho-mundoho etma enalong baloho fahat-enusug lit wereg, famen de ap siag duruk on en enambiangma ondoho on de mun enowaroho neg feseruk.

²⁹Ap wene melaleg fik-furebelug duruk on de o kwenang etma neg seneg lamuhup, ne mundoho-mundoho re kwenang ai fam neg welamuhup.

³⁰Ap fano ale duruk on en de ele enda wenggeleg fam neg uruk, aren de ele mag hauk kwit de we bekitmiroho neg uruk.

³¹Akni Allah en Awene melaleg anyo re endama foroho wereg ma re, anyo famen bosokandoho eke wilibik lauk fug.

³²Ap fano ale neg duruk on de ap siag on en watmin ulug, keregman ware femin ulug de elahan wil noruk.

³³Famen de ap ai it eneselei on enenggikmu amag ulug TUHAN en o fotog-esauk fug, ite wene katukdoho bilinggurukmu etmano en unggum og-omag ulug embeseruk fug.

³⁴TUHAN obam neg henenda ebereg wereg lit Aren diroho diyug suroho diyug ulug hweag-hesauk on anyo holoho neg duruk kamek, airoho duruk halug de hiren kwenang ai seneg welamag ulug Aren leho henobahaku; ne ap siag duruk on de mundoho eleg ail lauk hinil hauk kamuhup.

³⁵An den de ap siag duruk on en ele en werahap duruk on eke hauihik; at ebere e wilibig on ebe fanoroho wilibigmu omanggen mun yatdoho belabeg anyo hag deg latsi.

³⁶Ne, an kwe ai lauk men de at ebe elegma hauihik, an den[23] hera hauihik famen de at ebe hweaharihik fug.

³⁷Ap fano ale neg duruk on mel, enenda il wareg on mel ai furebeseiyug; ap en ninim folo-folo fano fano amul boruk on aire at ebe fobik eke nim welaruhu on deg.

³⁸Famen de ap kwasikdoho duruk on de elehapdoho fesehu; it enambiangma on de kanggap amuhup.

³⁹Ap wene melaleg fik furebelug duruk on de TUHAN en enahap wendat enepuk; ne it enebe anggin fanggindoho wereg ma Aren enalong baloho fahat enusug.

⁴⁰Aren de it let-enebeheg, enahap wendare feseheg, duruk, ne it enebe TUHAN fam enalong baleg wereg ma re, it ap siag duruk on weregman loloho wilibi feseruk.