Read Ninia Yali MAZMUR 38 Bible Online

MAZMUR 38 - Ninia Yali bible

MAZMUR 38

¹At Daud en enda eberoho ulug wam waroho TUHAN obahet foruk kwit isi ale Daud asuni anyo.

²TUHAN nakni, an de Hat holok fam unggum og-nom fug, ne hahummu het fam an nobam yeik nowaruk fug.

³Hat handog bisingdoho re an nebe fam kwik wahasi, Hat henggik omamne fam mun berel neg neauk kahen on aire mun anggin deg ma hauk kahi.

⁴Hat holok an nobam ferihin ai fam de an naouk hiling am fug on wauk kahi; an nasiag fam deg ma re nebe fam abirangge fanoreg ma eke wereg fug.

⁵Ik fu waharuk on anggelegma hagdoho an nasiag sahalimu obuk irihik, nasiag anggin de an den leg ha fug alereg lahi.

⁶An den mundoho morue ale dirihik mu re, yebil omano re muluna wilipuk kwit de amben mun siag deg.

⁷Nukoho hunduko re nenda wat-dauk kwit norohole hesiloho wereg lit, norohole wamborebelug kungguk deg lit welahi.

⁸Ahanhan angge en de nebe fam fulung durukmu re, nebe fam koloreg ma eke wereg fug.

⁹An nebe nomamne mundoho eleg atuk kwit de nobam oko song urukmu welahi, nenda ouk en de mun nenek yobaruruk kahi.

¹⁰TUHAN nakni, an nambono hauk kahi ale aire Hat mundoho holuk deg neg. Ouk en wanggonggo hauk kwit nele uruk kahi on aire Hat hilmu eke heraho wereg fug.

¹¹Nenda anggen bong bong angge duruk, nomamne mundoho eleg atsi, nil de mundoho mum mam uruk.

¹²It nombalisi mel, nori namepsi mel, de an nobam naouk wereg ale anyo nealugde ahaye napuk. It nowesi nautsi on en famen ohore an enerim naplug lauk.

¹³It ap en an nowatul boruk on en de an nobahet sabu yep duruk; ne an nebe alema re nobahaul boruk on en de, nebe mun elehap nobahaukoho re, enele wal uruk.

¹⁴Famen de an sure ap enesanggo dahom en enele holduk eleg anyo hag deg lahi, ap enele hebu lareg on en enele uruk eleg anyo hag deg lahi.

¹⁵Dik-demdoho, an den ap enesanggo holduk eleg on hag deg lit de, ai fam de an den oho onggo onggo uruk kahi fug.

¹⁶Famen de TUHAN nakni, an de we Hat hobam neg nenda ebereg welahi, ne nakni TUHAN Allah Haren neg an onggo hweag-nutuk kahen.

¹⁷An nebe nong-hongdoho welahi ale it naselei on en inil nealug enahayeg amag ulug embesouk fug, an nebe daloroho ying-atuk halug iren enele fam werahap howag ulug embesouk fug.

¹⁸Hundig handig ouk wauk kwit de, an nebe waroho ying-am ale duruk kahi.

¹⁹An den dahandoho dirihik ale etmano fahet neg nenda wenggelduk men de nenda firatuk en de; an den nasiag omano fag-duruk kahi.

²⁰It ap ninim minggirig lit duruk on de enebe hum deg lit enomamne deg, iren de an nebe welahi ale fahet enerim napuk.

²¹An den fano ale neg duruk kahimu re, ap en siag ale durukmu fano ale debeseswa on omano en an enaselei on hag napuk.

²²TUHAN nakni, an nobahalug la fug, nakni Allah an wereg lahimu en Hat hebe yatma aik la fug.

²³TUHAN nakni hebe an nahap wendat napuk on welahenma re, folo-folo watlug an let-nabik ma.