Read Ninia Yali MAZMUR 39 Bible Online

MAZMUR 39 - Ninia Yali bible

MAZMUR 39

¹Ap homi en suni wilibi folug enebe ambine urukmu melal-enepuk on fahet, Daud asuni. Yedutun fahet.

²An den wenggel-hauk kwit de, “An nambilik anggen fam en siag dihi ha no re, an nonggwareg en kahale fahat-dauk katmin, ap homi siag duruk on an horogdoho wereg li em de, an de nele uk fug angge bok welatmin,” Ulug uruk kahi.

³Airoho ulug de an anyo nele uk eleg angge behe lambek uruk kahi ai fam, an nonggwareg nebe siaho fahat-dauk kahi. Ne, an naouk hauk kahi on anyo ekenim anggin aik waharukmu hauk kahi;

⁴An nendama mun anggolo siagdoho nenda firaik waharuk. Atuk ale anyo wenggel-hamin ulug durukmu re, nendama eke nim anggin ale neg aik waharuk; airoho neg atuk en de ambiangma an den uruk kwit de,

⁵“TUHAN nakni, an nebe noluk welahi on su mun horog deg anyo noluk amag ulug de, an nebe ke salim nong aruk ai hweag-nimin,” ulug uruk kahi.

⁶An den umur noluk welahi on aure Haren we mun horogdoho ene ferihin! An noluk welahi ale au fahet Haren de amu angge we folo-folo siag atuk angge hag deg lahen. Demdoho ap homi nenoluk aire enele ahe fu esauk on hag deg,

⁷nenoluk de enapumag lepeng ulug lauk anyo hag deg. Ap en di duruk su duruk etma re we alemaroho hag duruk; aren angge di angge su angge kabog-dauk famen de etma ap di en nauk hwelauk karuhu angge ulug at apeleg deg kweleg duruk.

⁸TUHAN nakni, an den Hat hobam nunggwe on fahet nangno heauk katmin? We Hat fam neg an nenda ebereg welahi.

⁹An nasiag etmano fam en fiselaroho nobahain; an ap sohou on en enalitno napuk angge hagdoho nobahauk fug.

¹⁰Haren an komo napuk kahenma re, an nambilik leberuk fug angge bik-bok welahi.

¹¹Haren yeik nowareg fam an mun waram ale duruk kahireg de unggum an nobam ferihin on ai Haren oko fein.

¹²Ap homi re it enesiag duruk onggo Haren unggum enobam feseheg, komo enebeheg, duruk kahen; demdoho ap homi aire enele ahe fureg on wereg lahe. Ne, Haren mumlen al berel esauk hagdoho berel-esehen ha man de, at fam orohole buhun angge eke welam fug alereg.

¹³Nakni TUHAN, an den somban uruk kahi on hesanggo holin, an den Hat hobam heng hapuk kahi on ai fubi nobahain; an oba yatuk li em de Hat bok wereg lam fug. It nambu-nombasi we elamna fahet welatswa hagdoho, an oho we elamna fahet Hat hobam hobaleg welahi.

¹⁴An nebe la fug li ne suma mel wereg elegma nea fug li em eta, an den il dorangge lohon nahayeg hauk karuhuk en de, an nele ying napuk eleg.