Read Ninia Yali MAZMUR 40 Bible Online

MAZMUR 40 - Ninia Yali bible

MAZMUR 40

¹Ap homi en suni wilibi folug enebe ambine urukmu melal-enepuk on fahet, at Daud asuni anyo.

²An nenda hambuk halug wereg lit At TUHAN en let nabik wamag ulug nangno hauk kahimu; Aren an nebe fubi nobahakeg, nele esanggo holeheg, napuk.

³An nebe bohwe ele mun ilmu siag on fam wereg ma mel, sabelep mun lum-lum angge duruk on elma mel, wereg ma Aren lisoho lahabe nobahaik wahasi. Aren de an nebe helep unggulmu nobahaik lahasimu re, an neyog lauk ale ohore buhun atsi.

⁴An den suni keron fam uruk kwit, suni nit nenakni Allah anyo motdeg suni uruk kamag ulug Aren mamul napuk. Ap homi humdoho en inil halug de enakol atuk mu re, iren TUHAN fam enenda demdoho boruk.

⁵It ap homi TUHAN fam neg enenda demdoho boruk kwit, kembu dewa omano fam apne wauk eleg on mel, ite ap winik-wonog uruk on fam let-nenebukwag ulug heng enepuk eleg on mel, etma enahayeg boruk kamag.

⁶TUHAN nakni, Haren di angge su angge nit fahet hum ale waldoho ferihin, nakni TUHAN Allah, Hat de amu on inim ilit habuk fug on welahen! Haren duhuk ulug abug wilibig welahen on etma mun hum alereg ma nit nenobam fogdoho, abirangge dindilehe ha fug alereg.

⁷ Di angge su angge Hat hobahet feik waharuk on nim, siburu mel, nauk angge werako feik waharuk on mel, etma Haren hendareg lahen fug; yal angge waroho yalduk on mel, enesiag horukwag ulug waroho foruk on mel, etma feik manik ulug Haren heng-enepuk kahen fug. Famen de an den Hat hele nesanggo hole foukwag ulug, Haren an nesanggo og-nitihin.

⁸Ai en an den uruk kwit, “An nebe su, buku yinggiloho wereg on ai fam de an nobahet at baleg wereg.

⁹Nakni Allah, an de Hat henda hahayeg boruk kahen ale etma duruk ale fahet nahayeg napuk, Hat hawene melaleg anyo an nendama yohware ferihik mu wereg,” ulug uruk kahi.

¹⁰It Hat homaliki kabogdeg on enesahalimu en de Haren nit nenahap wendat-nenepihin ulug, wene enahayeg wene ai saharuruk karuhuk. TUHAN nakni, mundoho ai Hat holuk deg, an den de lohon bale fouk fug angge wene uruk wauk kwit neg welahi.

¹¹Wene enahap wendat-enepuk wene aire an den namu nendama heraho lahi fug, Haren let-nenepuk kahen ale fahet mel, Haren dipdoho neg duruk kahen ale fahet mel, an den hundig hweag-esauk kahi. It Hat homaliki humdoho kabogdeg enesahalimu en de an nele eleg angge bok welahi fug, Hat henda hundig nenepuk kahen ale mel, dipdoho duruk kwit welahen ale mel, hundig bilingguruk kahi.

¹²TUHAN nakni, an Henda hundig napuk ale mundoho ulug embesouk fug; Hat henda hundig fam inim, dipdoho neg napuk kahen on anyo fam inim an nebe nalong bal-nusug welamin.

¹³An de anggin fanggin humdoho en walinggoho kwelap-nusugmu welahi, ebe deg alere wenahauk fug alereg. An de nonggwareg nasiag en mug-neaukmu re, an den nil ha fug ale napuk. Ebe deg alere an noruk angge nunggulmu we dotdeg famen de mun alongdoho deg, ai fam de an nendama nong hong napuk.

¹⁴TUHAN nakni, an nahap wendat nabin, an folo-foloroho let nabik ma TUHAN!

¹⁵It ap an nowarukoho enenda duruk on etma re enalong elehapdoho feserukmu enenda nong hong ulug somban esa lowagdoho. An deg lahi ale fahet ap en kuk saloho belap napuk on etma enowaroho monde feselug maben hag deg boukwag.

¹⁶It ap homi an unda yag napuk on etma re, youk lalug enenggali amag.

¹⁷Ne, it ap homi mundoho Hat hapne wauk on etma neg de enahayeg en deheg, enamoldo en deheg, duruk kamag, ne it mundoho Haren enahap wendat-enepuk kahen on anyo fam enahayeg wereg on etman, enele fam hundig uruk kwit de, “Demdoho TUHAN aire mun andung-dang wereg on.” Uruk kamag.

¹⁸An sure nenggik eleg lit nomamne elegdoho lilipnareg lahi, famen de At TUHAN en neg an fubi nobaharuk. Hat de an let nabeheg, nahap wendat nabeheg, duruk on welahenma re, nakni, Allah Haren andomog ale duk fug!