Read Ninia Yali MAZMUR 41 Bible Online

MAZMUR 41 - Ninia Yali bible

MAZMUR 41

¹Ap homi en suni wilibi folug enebe ambine urukmu melal-enepuk on fahet, Daud asuni anyo.

²Ap homi en it eke enenggik elegdoho deg ma fubi debeseruk on aire, enahayeg hauk kamag. At TUHAN en de ap ai obam nong-hongdoho wereg ma let-duruk karuhu.

³TUHAN en at ebe along baloho foroho welaheg, at ebe hwalduk kaheg, o kwenang An den sali wareg anyo fam wereg ma ahayegap kwelabe feheg, ne ap enaselei on enenggik og-esa fug angge deheg, duruk karuhu.

⁴At ebe ouk deg li em de At TUHAN en neg let duruk karuhu, ne aouk wereg on anyo ebe hilinggi foruk karuhu.

⁵An den uruk kwit de, “TUHAN nakni, an de Hat hobam neg somban uruk kahimu re, Haren henda nealug an nebe hiling nabin,” ulug uruk kahi.

⁶It naselei on en de an nobahet mun enolok ale neg uruk, iren enenda boruk kwit de an nebe su waralema iren enapeleg alep aho boruk.

⁷Ap homi an kwelap nea waharuk on etma re, enenda hebel-febeldoho deg fug. Iren de wene obahatman an nobahet hweag-heheg kabog-dulug de, di kwe su kwe saharil lauk.

⁸It mundoho an enerim napuk on en de enele mul-mul ale uruk, Iren an nobahet[24] nebe mun alema re nobahaukoho uruk.

⁹Iren uruk kwit de, “Aouk de mun anggindoho wareg ma re, feiyaloho inam fug alereg.” Uruk.

¹⁰ Ap nori ninim hundig on wene airoho uk fug alereg boruk kahi on en mel, ne it siburu an nobam misigmu nauk on en mel ohore an anyo sebeloho nobaharuk.

¹¹It naselei on en siag ale nobaharuk on ai an den oho onggo it enobam airoho debesehuk en de, TUHAN nakni, Haren henda hundig nealug an nebe hiling nabin.

¹²Ne, an lahe it naselei on en nalong elehapdoho nobaharuk eleg halug de, ai fam Haren an henda nusug lahen anyo noluk aruhu.

¹³An nenda hebeleg lahi ai fam de Haren an let napuk kahen, ne an nebe Hat hinim mundoho-mundoho welamag ulug nobaharuk kahen.

¹⁴ TUHAN Allah it ap homi Israel on enakni ai neg motdeg mot deg welamag! O ketia huli en fobik mundoho-mundoho etma At neg motdeg welamag! Airoho nen welamag. Amin!