Read Ninia Yali MAZMUR 42 Bible Online

MAZMUR 42 - Ninia Yali bible

MAZMUR 42

¹Ap homi en suni wilibi folug enebe ambine urukmu melal-enepuk on fahet, it enunggul unuk Korah on en mamul-enepuk katfag asuni anyo.

²No rusa en ik wirig atuk on ahum fahet endama ahe duruk en enda fururuk anyo hag, an nendama oho re nakni Allah Hat hobahet nenda fu duruk en welahi.

³An den de Allah At mundoho oluk wereg on anyo fahet nendama fu en duruk kahi. Nunggwe salim At Obam wirigmu etma lahukdeg akit wene kabog-dik lahuk aho?

⁴Nukoho hundig hup hundig noba yag-dauk kwit wereg lit, nilue re nasiburu nauk on atuk mu welahi. Nukoho hundig-handig it naselei on en hein og-neauk kwit, “Hakni Allah re kema wereg?” ulug hein og-napuk.

⁵O endam ap homi enebe esan lohwaloho wene kabog-dul ulug laukmu, an TUHAN Obam wirigmu laukmu, it ap homi esan lohwaleg on enalukwema lauk kweleg, suni motdeg suni eheg, enahemet deheg, dil lauk katuhuk ale etano ebet halug de, an nendama mundoho hesildukmu welahi.

⁶Nunggwelug an nenda su fituk kwit hesilduk katmin ahi? An de we At Allah fam neg nenda ebereg welaik, Ai fam de an den nakni Allah nahap wendat napuk on ai fam, ekenim dang duruk karuhuk.

⁷O hele waroho hwik-nenebik wahausa ma suma wereg lit de, an nendama nahut aeg neg atuk mu, ai fam an den TUHAN obam neg ebereg lit welahi. An nendama ouk anggolo hauk kahi on aure ik fu leheruk kwit dil waharuk anyo hagdoho durukmu etma eleg aik lauk, ne ik funag-lenggag angge dil waharuk anyo hag de nendama nong-hong ik laukmu welahi; Dom Hermon mel, Dom Mizar mel fam en Ik Yordan fanggong kwe hul belapuk kwit dungdik wamburuk hag durukmu hauk kahi.

⁹Airoho nobaharuk fam o hup anggo an den Allah noluk indip anyo fam suni eheg, somban eheg, duruk karuhuk en de, We At TUHAN en neg o nukohoreg lit enda hundig napuk ale unug neeheg duruk kamag.

¹⁰An den de Allah an nibil atuk on anyo fam uruk kwit de, “Nunggwelug an hapelehapdoho nobaharuk kahen? It ap homi naselei on en an nobam anggin fanggindoho neg nobaharukmu, nunggwelug an ouk-bouk ai hauk kwit welahi?” ulug uruk kahi.

¹¹It naselei on etmano en bilip napukmu re, nenda mun hesil-hesil lauk; hundig-handig iren hein og-neauk kwit de, “Hat hakni Allah re kema wereg?” Neg uruk.

¹²Nunggwelug an nenda su fituk kwit hesilduk katmin ahi? An de we At Allah fam neg nenda ebereg welaik, Ai fam de an den nakni Allah nahap wendat napuk on ai fam, ekenim dang duruk karuhuk.