Read Ninia Yali MAZMUR 44 Bible Online

MAZMUR 44 - Ninia Yali bible

MAZMUR 44

¹It enunggul unuk Korah on enasuni, ap homi mamul-enepuk kwit uruk asuni it ap homi en suni wilibi folug enebe ambine urukmu melal-enepuk on fahet.

²Nenakni Allah, Haren o indik-endam etma duruk katfag ale mel, di angge su angge wal-duruk kwenang ale fahet mel, it nenambu nenombasi en diroho debag ulug dindildukmu nit nenemu domog en mundoho nenesanggo holduhuk.

³It Hat homaliki ap homi enunggul unuk amu on enanggwenang fam etma welamag ulug Haren neg muko wilibi feserihin. It ap homi enunggul unuk amu on de Haren enebe alema re feseruk katihin, famen de it Hat homaliki on neg de enebe saha il lauk kamag ulug feserihin.

⁴Hat handung-dang wereg lit, Hat homamne along on fam Hat hebe ininim wereg ale ename ferihin. Haren it Homaliki fahet henda esauk kwit atlug let-enepihin.

⁵It Hat homaliki enalongap debeseruk kahen on, Nowe raja nakni Allah Hat neg welahen.

⁶Hat homamne fam neg niren it nenaselei on enalong elehapdoho feseruk kahe, ne it ap homi nit nenowarukoho housalik waharuk on etmano sebeloho feseruk kahe.

⁷An de nonggwareg nasehen fam nenda dipdeg lahi fug, ne an nenggarog en de an nahap wendat nabuk fug alereg.

⁸Famen de we Haren neg it nena weim on fam en nit nenahap wendat nenepuk kahen, ne it ap homi nit enerim nenepuk on etmano enalong elehapdoho feseruk kahen.

⁹Ai fam de niren Hat neg hundig-handig mit-mot hobaharuk kamuhuk, ne hundig-handig de Hat neg dang hapuk kamuhuk.

¹⁰Famen de ketiare nit Haren lin nesauihin nit nenalong elehapdoho nenobahaukwag ulug embeserihin. Ne, Hat de nit weim yabukoho lohwalik laukmu anyo ninim lauk kahen fug.

¹¹It nenaselei on nenakol en bupa ukwag ulug neneboharihin, ne iren de nit nenangge di angge su angge mundoho del dausa.

¹²Domba warukoho senetuk anyo hagdoho nit sen-nenebukwag ulug Haren fotog nesauihin, ne Haren de it ap homi enunggul unuk enap wereg kwe etmano del fol nesauihin.

¹³Nit Homaliki anyo Haren onggo we mabendoho fam bal-nenepihin, ne airoho dirihin fam ambiangma eke atsi fug.

¹⁴It ap homi nit welaheman elen-elan wereg on etmano en bulip nenepuk kamag ulug nenobaharihin, ne iren de unda yag nenebeheg, enalitno nenebeheg duruk.

¹⁵Haren de nit nenebe ap homi enunggul amu on etmano enambilik men siahap biahap nenobaharuk kamag ulug nenobaharihin; iren de enunggul kwal-kwal halug de nit anyo maben hag ulug sebeloho nenobaharuk.

¹⁶Nukoho hundig an fam direg on sureg on ulug neg uruk kwit, it nenaselei on mel ne it wene enahummu sebeloho foroho lit wereg on etma enambilik fam en mel, mabenap nenobahakeg, siahap nenobahakeg, durukmu re an nenggali hauk kwit norohole wambo uruk kahi.

¹⁸Niren Hat nenapeleg atsi fug famen ite Hat hinim sali wat-wat atuhuk on anyo dahandoho duruhuk fug famen de, mundoho etma nit nenobam neg aik waharuk.

¹⁹Nit nenendaman de Hat nenapelehap deberuk kahe fug; Hat Hawene melaleg etmano re niren bapdoho hag esanggoma deberuk kahe fug.

²⁰Famen de nit anyo Haren mun anggelegma nenobaharihin; Di on su on olok on sahalimu etman de niren duk fug ale neg nenepuk.

²¹Niren lahe Allah fam apne wa fug angge en, niren allah hag debelug apne wauk on etmano fam somban uruk kahe halug oho re,

²²At Allah en de nit nenendaman herako wenggelduk kahe ale ohore mun enamegdoho nesaukmu deg ma re, At Allah mundoho oluk neg deg.

²³ Niren Hat hobahet neg duruk men de nit nenebe mundoho waram ale horog atuk kahe, ne nit de domba watuk on hagdoho nenobaharuk.

²⁴TUHAN nakni, nunggwelug nohoruk kahen? Holuk amin. Hat ketia holuk atlug din, nit li mundoho-mundoho etma herim en nenobaharuk kwit neg welam fug.

²⁵Ne nit anggin fanggin ale heheg, ouk boukdoho heheg duruk kweleg oma re, nunggwelug Hat de heraho lit neg welahen?

²⁶Nit de mundoho nenalong eleg ahereg kwenangma suma sisaroho wereg lit kwenang ahe fam yinggig lahe.

²⁷Hebe inatlug nit let nenebik ma, Hat henda hundig neg nenepuk kahen on deg ma nit nenahap wendat nenebin.