Read Ninia Yali MAZMUR 45 Bible Online

MAZMUR 45 - Ninia Yali bible

MAZMUR 45

¹Suni it enunggul unuk Korah on en enenda hundig duruk ale fahet felaleg on. Ap homi en suni wilibi folug enele ambine urukmu melal-enepuk on fahet, unggut seberoho uruk on unggul unuk Bunga Bakung ulug uruk katfag.

²An nele buhun ale uruk kahi etma re nendaman lahaik waharuk, an nasuni re at raja obahet wilip-utuk kahi. Ap suni kohaleg suni felalduk katswa on mun enggat on en lisu balduk hag, an nambilik anggen fam en kohaleg wene imin ulug fouk deg lahi.

³Di ap homi su ap homi mundoho wereg on etma enesahalimu en de we hat neg hil aluli on welahen, Hat hele urukmu re we fano ale neg hoporoho uruk kahen, Ai fam de At Allah en fanoap henobahasi ale ai, airoho mundoho deg lit neg welaruhu.

⁴Hun raja handung-dang wereg hahun henggarog haluwahimu kelog dakin, ne hat de hebe mundoho leho lit fulu bolan on deg lahen!

⁵Hele sako fam wene katukdoho kong deheg, ne habi fam wene demdoho on anyo neg welamag ulug ning debeheg, dikoho, Hat hebe halong-balongdoho halili angge lik-loukdoho inaik lag, ne hat homamne fam de halong humon welamag ulug del dakin!

⁶Hat handog enggat mun wereleg on ai en de it haselei on etmano enenda sekandoho enowatuk kahen, ne di enunggul unuk su enunggul unuk hat heyog indipmu neg waroho ying-atuk.

⁷ An den ap homi melal-enepuk kamag[26] ulug Allah en homamne og-hitsi, Hat homamne aire airoho neg deg lit mundoho-mundoho welamag; Haren de mun katukdoho neg it homaliki melal-enepuk kahen.

⁸Haren de siag on fahet herim duruk kwit demdoho on fahet neg de hambonoreg lahen; ai fam de At Allah, hat hakni Allah anyo en hat momal-hapsi, ne it raja amu on maben hag deg kweleg hat neg de alongdoho hahayehap hobahasi.

⁹Hat hasum lahabeg lahen on de ahalue mur mel, gaharu mel, cendana mel amben fano angge amben neg duruk; ne hat hobam hebe wereg lahenma gajah andimuk fam wirigmu hwerieg wereg kweleg it binggong watuk on en watuk mu re hat hahayeg duruk kahen.

¹⁰O sili at raja wereg ma etma hwelani duhum on enesahalimu re at raja ahwelani kabogdeg. Ne at raja hweriegma takhta enggik bekit fil omano re at raja ohwe, ebene emas wirik on en neg alili angge lahabeg angge unduhuk wereg.

¹¹Yaho hwelanion, an nele uruk kahi on su henesanggo holiek, it hit henunggul unuk on mel, hit henombali indip on mel etma henapelehapdoho embeseyek.

¹²Hat hil aluli masiban deg lahen ai fam de at raja anyo enda lisuruk kahen, at aire howe anggere apma sebe iyug.

¹³It ap homi o Tirus wereg on en de hat hobahet di angge su angge walug kabog lahabik waharuk kwit; it enenggik dung enap en de hat henda waul ulug duhup.

¹⁴At raja ahaloho re mun ebene helag-felag anggeril hagdoho kwik waharuk, asum wandeg on aire emas on fam yihig angge wandeg.

¹⁵At ebe asum il yininig on muninig on wandeg ma at ebe ulukdoho walug raja wereg ma feik lauk, ne at ebere it ehebisi hwelahi duhum on neg en walug lauk, ne it etma ohore at raja obahet neg lauk.

¹⁶Hwele walug at raja obam silimu kwik lauk kwit de, iren enahayeg fam anggiluk dil kuruk!

¹⁷An nowe raja re hat neg, it hambu-hombasi kain unduhuk lit hwerieg latfag ma takhta anyo fam hwerieg lamag ulug, haren homaliki ap humdoho endag-enebuhun. It enebe re ap homi o kwenangma suma abirangge fahet enalong wereg on welamag ulug Haren unduhuk fesehun.

¹⁸Suni su fam de di li em su li em welamuhuk li etma an den hat leho hobaharuk karuhuk ne it ap di enunggul unuk su enunggul unuk en oho mundoho-mundoho etma hat neg mot-hapuk kamuhup.