Read Ninia Yali MAZMUR 48 Bible Online

MAZMUR 48 - Ninia Yali bible

MAZMUR 48

¹It enunggul unuk Korah on enesuni.

²Nit nenakni Allah obam duk amu eneg on[27] wereg ma, At TUHAN ebe dik-demdoho leho wereg ma re motdeg motdeg neg wereg.

³ Allah anduk Sion aire, il buhundoho unduko lahabeg o kota Raja Leho on wereg ma aire ap homi kwenangma wereg on enahayehap deberuk.

⁴At Allah ebere faklehet ohoma ilonggoma wereg, famen de At amu en neg along baleg wereg liren deg.

⁵Furiek, it raja omano kabog dehesareg; bin kul ulug waharuk angge ai.

⁶Famen de iren duk ai inil fu halug de inil heleloho yande fouk deg angge wamburuk; youk lalug de enenda nong-hong angge leil watil lauk.

⁷Etma airoho lalug de homi en omalik enderukoho henyet watuk hag, ne kapal hol sielu waharuk kwit erapdoho siag atuk hag,

⁸etma iren enakol en enowag elek duruk kwit ouk hauk.

⁹Nit nenesanggo holduk katuhuk ale anyo higitdoho, ketia niren ninil hauk kahe, At TUHAN Mun Omamne wereg on obam kota etma. Kota aire nit nenakni Allah obam kota, Aren de li mundoho-mundoho fahet along baleg lit wereg.

¹⁰Nenakni Allah, Hat Hobam etman, niren Hat henda hundig nenepuk kahen ale anyo ebet heauk kahe.

¹¹O kwenangma suma Hat hunuk neg leho wereg ma motdeg lit neg wereg, Haren de katukdoho neg wene biling enepuk kahen.

¹²Haren ap homi Sion on mel Yehuda on mel eneselei on etmano unggum enobam foruk kahenma, iren enahayeg en hemet duruk kamag.

¹³Hiren Sion ai maseriek, Sion ai hwaninggiek, hwaningguruk kwit de anum-anum hagdoho wiroho lahabeg on ai nunggwe en ulug wenahayek.

¹⁴Hiren ondohoma on fam dindil-esauk kamuhup en de, elehet fak ebe fubi debeheg, hembit angge fubi debeheg, diyug. Ne, hiren uruk kwit de:

¹⁵“At aire Allah, li mundoho-mundoho nenakni Allah anyo ai, mundoho-mundoho etma Aren neg nit melal-nenepuk karuhu,” ulug hweag-esauk kamuhup.