Read Ninia Yali MAZMUR 49 Bible Online

MAZMUR 49 - Ninia Yali bible

MAZMUR 49

¹It enunggul unuk Korah on enasuni. Ap homi en suni wilibi folug enebe ambine urukmu melal-enepuk on fahet.

²Yaho, hit ap homi di henunggul unuk su henunggul unuk etma holiek, di ap su ap o kwenangma suma welahep on etma,

³ap homi maben on mel, it enowesi yain-kain mel halug oho, ap enenggik eleg on mel, enenggik dung on mel halug oho, henesanggo lang diyug.

⁴An den wenggel-hauk kahi ale etma re mun ilonggoma alereg anggere, an den nele mun nenda wenenggeleg fam neg ikoho lahi.

⁵An den de enele unggutdoho uruk on ai furebelug de, binggong kecapi kong-duruk kwit de ai ebe diroho fahet uruk ulug enegdoho imin.

⁶An nobam anggin-fanggin aik waharukmu inim, it ap homi naselei on siag mun alongdoho duruk on etmano en maseroho kwelabe nobahaik waharukmu inim, de an nakol napuk fug.

⁷It aire enangge fam enenda dip-debelug duruk, ne enenggik wereg anyo fam enawonog atuk kwit duruk.

⁸Dik-demdoho anggere, ap misig eke en are ahap wendareheg, ite Allah fam are fahet ulug onggo baloho fiselarebeheg, duk fug alereg.

⁹Neneluk onggo balduk on aire onggo mun hum-ham deg ma re,

¹⁰at ebe waratuk on fam en lil atlug oluk mundoho welamag ulug di angge su angge onggo fouk famen oho re eta nim higitdeg lam fug alereg.

¹¹Eleg, ap enenda wereg on famen oho re waratuk mu aren esahu lit deg, Ap morue on mel sohou on mel ohore enebe ambine eleg atuk kwit, enangge di angge su angge etmano ap amu on fahet lin-esalug waramuhup.

¹²It enebe re mundoho-mundoho ap wareg on sal-enepukmu etma welamuhup; o endam it enoluk wereg lit enangge hum hamdoho welatsi famen de it enebe mundoho-mundoho we etma neg welamuhup.

¹³Ap homi re enangge di angge su angge mundoho wereg ma neg welamuhup fug lit deg; wam di angge su angge waratuk ale higitdoho ap homi oho airoho eleg amuhup.

¹⁴It ap homi enonggwareg enebe enomamne fam dip debelug duruk on mel, ne it enele uruk on fam homorobahat dalug wereg on mel, it enebe fobik welamuhup ale mel, it enambiangma aik lahup ale mel de airoho neg amuhup.

¹⁵Domba hagdoho it enebe waramuhup ulug mun eneko fesi; ne waratuk on anyo en gembala en duruk hagdoho it enebe hwal-enepuk karuhu. O hubet deg kweleg ap homi bekitdoho duruk on en it enalong elehapdoho feseruk kamuhup; it enahap de ap homi waratlug laukmu it enebe mun fanoroho weregman yat-batma etman wereg lit filik atuk karumuhup.

¹⁶Famen de At Allah en neg an loloho nobahaku, Aren neg at waratuk on anyo omamne fam en fiselaroho nobahaku.

¹⁷Ap misig eke enggik wereg aheg, angge di angge su angge dungdoho kabog deheg, duruk halug de, henendama henakol duk fug.

¹⁸At ebe waratuk li em de aren angge eke hwelalug lahu fug anggere, ne at angge etma at ebe inim seberoho waratuk mu erahamu wambik lahu fug.

¹⁹Ap eke ebe oluk wereg lit aren duruk on etmano ambiangma fano ale neg atuk mu; ne airoho atuk ai fam ap homi en motdoho neg lahabe foruk famen oho re,

²⁰at oho it ambu-ombasi enombolim mug-eneplug, obale mun heik koruag deg ma etma mundoho-mundoho wambik lahu lit deg.

²¹Ap homi re it enebe fam enenggik wereg lit neg welamuhup fug lit deg, wam, suwe, bak, atuk hagdoho ap ai oho ebe eleg aruhu lit deg.