Read Ninia Yali MAZMUR 5 Bible Online

MAZMUR 5 - Ninia Yali bible

MAZMUR 5

¹Ap homi en suni wilibi folug binggong unuk suling ai uruk kweleg enebe seberoho en urukmu melal-enepuk on fahet. Daud asuni su.

²TUHAN nakni o, an den nele uruk kahi on su hol nabeheg, nenda fu en uruk wauk kwit welahi ale su fubi nobahakeg din.

³Hat de an nowe raja unduhuk wereg lit an nakni Allah re Hat neg welahenma re, an den nele hobam uruk kahi on ai fano bolug let nabin.

⁴An den de we Hat nakni TUHAN hobam neg somban uruk kahimu re, an den nele hubet hweag-hutuk kahi on ai hesanggo hol-nabin. An den o munangge-manangge hat hobahet walug og-hirik watlug[4] de, nakni TUHAN Haren onggo hweag-nomag ulug nangno hauk kwit welahi.

⁵Hat de ap homi en siag ale duruk on fahet herim enusug lahen on Allah anyo welahen; ap siag duruk on de Hat hakit ulug de wam fug alereg.

⁶Ap winik-wonog uruk on fahet Haren kumu enusug lam alere mun hil mahip duruk kahen, ne ap homi siag duruk on fahet de Haren herim enepuk kahen.

⁷Ap homi wene seiale uruk on de Haren neg elehapdoho feseruk kahen, ne it ap homi laloho uruk on nim, it ap homi en it eke binggi enowatuk on nim de, it ap homi su hirik-herimdoho enepuk kahen.

⁸Famen de we Hat henda hundig nenepuk kahen on hum deg anyo fam atlug, an Hat hobam wirigmu kuruk kahi. An den de Hat hobam mun amu eneg on wirig fil etmano nalukwereg lit nelenggen dimirebelug hapne wauk kahi. Ne an den de nenda mun wambo ulug hapne wauk kahi.

⁹TUHAN nakni, ap homi an nim enaseleireg on de mun hum deg ma re, an den Hat henda boruk kahen ale neg duruk kamag ulug melale-nobahakeg, ne kwe su on fam lakin ulug kobokwe uluhun hweako nobahaik laheg, duruk kamin.

¹⁰ It ap homi an naselei on etman enele uruk on de demdoho uruk ulug bouk fug alereg; it enendama re siag on dul ale ulug neg hopo dikdeg. It enele mag haukmu re enele buhundeg lit ap enda lisuk alereg; famen de it enenda ilonggoma etma re filik on mun hum ale hoporeg liren uruk.

¹¹It enonggwareg en wene melaloho lahapuk on etma fam enebe alemat amagdoho re, Nakni TUHAN Haren unggum enobam og-esakin. Iren Hat hele sahale folug duruk kwit kwasikdoho duruk on de mun hum alereg en de it enebe siloho wilibi fesein;

¹²It ap homi Haren enalong balegma wereg on de enahayeg halug, mundoho-mundoho enanggiluk duruk kamag. It ap homi Hat hobam enenda hundig bolug duruk on etma re Haren enalong bal-enusug lamin; iren Hat bolug enahayeg hauk kamagdoho.

¹³Haren de it ap homi Hat fam dipdoho neg duruk on omano fanoap debeseheg, Hat henda hundig fam enalong baloho fahat-enusug laheg, duruk kahen.