Read Ninia Yali MAZMUR 50 Bible Online

MAZMUR 50 - Ninia Yali bible

MAZMUR 50

¹Asaf Asuni. TUHAN Allah Mun Omamne Humon anyo ele uruk; Aren de mo lahaik waharuk on huli-hulimu wereg on huli en de mo obuk uruk on huli-hulimu wereg on, ap homi o kwenangma suma wereg on fam ele uruk.

²Kota mun fanoma o Sion etmano en, At Allah aseleg ombagbag fam enam aik waharuk.

³Nit nenakni Allah ai ebe waharuk kwit de At ebe bok wereg fug, At ebe owan wam fug mu re indok ambulbul melelang duruk on atag waharuk, ne hol sielu mun humon on en de maseroho walug waharuk.

⁴Aren omaliki katukdoho owag en enepukmu inil welamag ulug de, Aren bohol inim kwenang inim wol-esauk.

⁵Aren uruk kwit de, “It An nomaliki mundoho ninim sali watuhuk deg, wam waroho omamneap deberuhuk on etma mundoho kabog-debeseiyek,” ulug isi.

⁶Bohol fam en fag-duruk kwit de At Allah ebe ap wene ayo wiroho kong-duruk on wereg lit, Aren it omaliki omano enawene baloho katukdoho kong-duruk.

⁷“Yaho hit An nomaliki on, An nele uruk kahi anggere henesanggo holiyug, Israel henap, an hit hinil hanim fag-duruk kahi ai, Allah re nebe An, ne hit henakni Allah aire an at.

⁸Hiren di angge su angge walug yalik waharuk kahep on ai fahet An den henobam hekip hesauk kahi fug; hiren walug yalik waharuk kahep angge etma re hundig An nolohotma foruk kahepma wereg.

⁹An den hit henowam sapi obam wirigmu wereg on etma fahet anggoloreg lahi fug, ite kambing hiren henowam amu on etmano enesahalimu on fahet anggoloreg lahi fug;

¹⁰Di wam su wam di on su on e enggelama wereg on etma re An nonggwareg nangge neg, dihinig on yihinig on o dom kwe wereg on etma re An den on neg deg.

¹¹Di suwe su suwe dom kwe wereg on etma ohore An den on neg, ne o lei kwe enoluk wereg angge etma mundoho oho An den on neg.

¹²Kwenang inim, ne kwenang ilonggoma yohwareg wereg angge inim etma re An den on neg deg ma re, An obok napuk halug ohore, An di on obok napuk ulug hit henobam nele ihi ha fug alereg.

¹³An de wam sapi ino sobaleg nauk kahi fug, ne kambing amep hwenanggeg oho nauk kahi fug.

¹⁴Hiren An fahet wam di angge su angge waroho og-nom hag de hiren An dang-napuk kahep on[28] ai og-nutuk kamek, ne hiren henele sali At Mun Leho wereg on nim watuhup on ai dipdoho neg deberuk kamek.

¹⁵Hit henebe henobam anggin fanggindoho wereg lit de An hwi-napuk kamek, ne An den hit ai fam en loloho henobaharuk ai fam hiren An mot-napuk kamuhup.”

¹⁶Famen de ap siag duruk on fam de At TUHAN en uruk kwit de, “Hiren de An Nawene Melaleg anyo eheg, ne An den sali wat-hesauihik on anyo fahet eheg, dehep ha fug alereg.

¹⁷Hit de An den komo ale hweag-hesauk kahi on anyo wam fug angge wereg lit, An Nawene Melaleg anyo nenerim ulug embeselug duruk kahepma re.

¹⁸Hiren ap heraharuk on misig eke hinil esalug de, hiroho at ombolim lauk kahep, ne hit oho re ap homi hambena duruk on mel hinim mangmangno duruk kahep.

¹⁹Hiren de we siag on neg uruk kahep, ne mun seiale wene neg ul ulug fouk deg lit welahep.

²⁰Hiren de hit henori on etmano sebeloho feseheg, ne henori henamep minggirig on omano enebug baleheg, duruk kahep.

²¹Ai on neg hiren duruk kahep famen de An de we bok welahi on ai fahet de, hiren boruk kwit, An de hit higitdeg boruk kahep. Famen de ketia en An den hit deg lahep ale fahet uruk kahi ai; ne mundoho aire hiren eneg deg ma howag ulug An den ename foruk kahi.

²²Hit Allah henapeleg atlug neg duruk kahep on ai furebahat dakiek; An den hi henebe mundoho elehap henobahakukmu ap en eke henahap wendare henobahaik wam fug no re kahaleg welamek.

²³Ap en wam di angge su angge waroho An nobahet fouk hag de ap en An dang-napuk on halug de, ap ai en An nalong bolug leho nobaharuk kwit duruk ai. Ne it ap homi kwe fik-foukdoho foruk on fam de, An den enahap wendat-enepuk on An fam en unug-esauk karuhuk,” ulug isi.