Read Ninia Yali MAZMUR 51 Bible Online

MAZMUR 51 - Ninia Yali bible

MAZMUR 51

¹Ap homi en suni wilibi folug enebe ambine urukmu melal-enepuk on fahet,

² At Daud en hwe Batsyeba inim hambena disimu at Nabi Natan en enggali warik wahasimu, at Daud en felalsi Asuni.

³Nakni Allah Haren de hundig henda hundig napuk kwit neg welahenma, an henda neakin, Haren henda hundig napuk kahen ale humon ai fam an nasiag elehapdoho fein.

⁴An den kwasikdoho dirihik on etma mundoho somaho nobahain; an nasiag dihik on ai Haren ho nobahain.

⁵An den nasiag dirihik on etmano Hat hobam fag-dirihik mu re, ne an nasiag etmano re hundig wenggel neg hauk kahi.

⁶ We Hat hobam neg an den siag dirihik, ne Hat hobam neg Haren ai siag on ale boruk kweleg famen an den dirihik. Ai fam de Haren an unggum og-nutuk kahen aire, an og-nom aleroho neg, ne Haren wene kong-duruk kahen on etma re we mun katukdoho neg duruk kahen.

⁷Ebe dik-demdoho re an nebe endag-atihik hulien anggere siag neg welahi, ne nebe nisinga ahummu wereg kweleg etma huli en siag mun nobam atsi.

⁸Haren de ap homi enendaman bekitdoho neg duruk kalep ulug boruk kahenma re, Haren henda wenggeleg fam neg duruk kahen on anyo an nendama etma hoporoho nobahain.

⁹An nebe buhundeg on amag ulug Haren ho nobahain, Haren an ho napuk halug an nebe no kapas il mun kut deg anyo hag aruhuk.

¹⁰An nendama Haren mun sunukdoho nobaharihin mu welahi on su nikangge nahemet howag ulug, Wene mun nahayeg ale neg urukmu nesanggo hole boruk kahi.

¹¹An nasiag etma fam en horohole enden atlug, an den di ale su ale kwasikdoho neg dirihik on etma horoho nobahain.

¹²Nakni Allah, Haren an nenda su buhun on amag ulug hilinggi nobahain Hasukun mun kain on ai fam nendama etma kerapdoho nobahain.

¹³Hat holohotma etman an hwik nea fug, an nebe fam en Hat Haheime mun eneg horeg on ai oko wa fug.

¹⁴Hat fam en neg nenahap wendareg wereg ai fam an nahayeg howag ulug nobahain, an den nenda fano fam Hat hele holoho duruk kamag ulug an nendama ai on og-nimin.

¹⁵Ai fam de an den Hat Hawene melaleg ai ap homi siag duruk on Hat hakit sombandoho wamag ulug, mamul-esauk karuhuk.

¹⁶Nakni Allah nahap wendat-napuk kahen on,[29] an nebe waraik lauk on ai fam en lisoho nobahain, ai fam de an nenda nahayeg en Haren katukdoho neg duruk kahen ale anyo fag-duruk karuhuk.

¹⁷TUHAN nakni, an nele ukwag ulug let nabin, ai fam de an den Hat neg mit-motdoho lahabe hobaharuk karuhuk.

¹⁸Hat de wam di angge su angge anggolop baloho og-hirik waharuk on ai fahet henda hahayeg deg lahen fug, ne an den wam waroho Hat hobahet ulug feik wahi ha man ohore, Hat hambono neg lahen fug.

¹⁹Wam di angge su angge waroho Allah obahet foruk ai hag ap homi enenda mun sebe ulug enenda wat-dauk kwit wereg on ai, ap homi en enenda sebe ulug enobabut aham duruk on halug de Haren herim en embeseruk kahen fug.

²⁰Nakni Allah, Haren Sion fam henda fano en debeseruk kahen ale anyo unug nesakin, o Yerusalem elehet fak meiyaleg on etmano nikangge obalma wirin.

²¹Ai fam de ap homi wam di angge su angge waroho yalduk on mel, ne abirangge yalduk on mel, ne sapi yohombuk on Hat hobahet mezbah emberimmu etma waroho yaldukmu mel, Hat hendama hahayeg aleroho deberukmu wauk karuhun.