Read Ninia Yali MAZMUR 52 Bible Online

MAZMUR 52 - Ninia Yali bible

MAZMUR 52

¹Ap homi en suni wilibi folug enebe ambine urukmu melal-enepuk on fahet, At Daud en mamul-enepsi asuni.

² At Daud ebe hun Abimelekh wereg ma akit aik lasimu, hun Doeg obam Edom on anyo en Saul akit hweag-irik lasimu isi asuni.

³Yaho hit ap henomamne henap, hiren ap Allah en enda hundig on fam siahap deberuk kahep on etma fahet, nunggwelug henawonog atuk kahep?

⁴Nukoho hunduko etmano re haren seiale eheg, ne siag on duhuk ale ulug wene abug mareheg, duruk kahen; hat hambilik anggen de waisa olok on hag deg lahen.

⁵Haren de fano duruk ale anyo embeselug de siag duruk ale fahet neg henda hundig deg lahen, demdoho wene uruk ale fahet osokoreg lit seiale uruk ale fahet neg hambonoreg lahen.

⁶Hat hele fam ap homi laloho feseruk kwit, enenda oukap kwelabe feseruk kahen!

⁷Famen de hat de mundoho-mundoho Allah en elehapdoho hobahaku; hat hebe hobam olman sen haplug lit hapil wilibik lahupdeg de, ap homi enoluk wereg ma suman elehapdoho hobahakup.

⁸Airoho atuk mu inil heahupdeg, ap Allah ele holoho neg duruk on omano enakol halug, unda yag-hapuk kwit de, diroho uruk kamuhup,

⁹“Ap Allah fam nalong baleg welamag ulug debouk fug angge, ite enggik dung on wereg ma hangge dindikdoho wereg kweleg deg ale anyo fam neg henda dipdeg wereg lit, ap homi enengge del-dauk kahen on anyo fam neg nambong seroho welemag ulug heraruruk kahen,” ulug uruk kamuhup.

¹⁰Famen an den Allah Obam olma etma, e zaitun enggela hesiloho wilipuk on hagdoho welaruhuk. At Allah en li mundoho-mundoho etma fam, enda hundig napuk karuhu ulug nendama demdoho boruk kahi.

¹¹An den de hundig-handig etma Hat neg dang hapuk kam ale napuk ne it ap homi Hat homaliki etmano inil hanim de Haren fano ale neg nenepuk kahen on ai fag-duruk karuhuk.