Read Ninia Yali MAZMUR 53 Bible Online

MAZMUR 53 - Ninia Yali bible

MAZMUR 53

¹Ap homi en suni wilibi folug enebe ambine urukmu melal-enepuk on fahet, suni unggul unuk Mahalat ai fene felaleg on. At Daud en mamul-enepsi asuni.

² Ap homi mun sohou on enendama en boruk kwit de, “Allah wereg fug” boruk. Iren de fano ale eke duruk fug, iren duruk ale etma re mun siag on mel, me nape hag on etmano mel neg duruk.

³At TUHAN ebe boholma wereg lit ap homi il fu esalug de, ap homi enenda wereg on mel, An napne wauk on mel, wereg a, eleg a? ulug hera-enepuk.

⁴Famen de ap homi enebe mundoho re At embeselug wilibik lauk kwit dahandoho neg deheg, enobabut mundoho nog-hong eheg disi, ap misig en ulug oho fano ale duruk on eke wereg fug.

⁵At TUHAN en uruk kwit de, “Ap homi en siag ale neg duruk on etma re enape enggat atuk eleg a? Iren An nomaliki enangge del deheg, An nobam somban eheg duk fug angge wereg etma hwi,” ulug isi.

⁶It ap homi siag neg duruk on en de it enakolap kwelap enepuk on eleg kweleg famen, it enakol neg atuk kamuhup, At Allah en de it ap homi hit hukdoho kwelap-henebik waharuk on etmano erim en fotog-esalug, it enowag siling del fol esaukmu re, hiren it enalong elehapdoho feseruk kamuhup.

⁷O Sion dukmu etman it ap homi Israel on enahap wendat-enebik waharuk kamag. At TUHAN en de omaliki enebe fam deg ale au mundoho hwaloho fesehu halug de, it Yakub en ondoho on enambiangma on au mundoho enahayeg duruk kamuhup.