Read Ninia Yali MAZMUR 55 Bible Online

MAZMUR 55 - Ninia Yali bible

MAZMUR 55

¹Ap homi en suni wilibi folug binggong kecapi watuk kweleg enebe ambine urukmu melal-enepuk on fahet. At Daud en mamul-enepsi asuni.

²Allah nakni, an den somban uruk kahi on su hol nabin, an den heng hapuk kahi on hol halug horohole enden am fug.

³An fubi nobahalug de an onggo hweag-nimin, ne an de nobam anggin fanggin wereg anyo fam mun nong-hong ihi.

⁴It ap homi naselei on en an nowarukoho nabug balduk ai fam inim, ne it ap homi siag duruk on en anggin on nobam foruk ai fam inim, an nenda humon fituk kahi. Iren de an nobam anggin deg ale neg deberuk, it enolok fam de an ena weim ap nobaharuk.

⁵Waratuk on anyo namelmel mun horog su aik waharukmu re, nendama humon fituk kahi.

⁶An nebe fam de nakol on inim, nowag elek deg on nim neg atuk, namelmel on de horog atelma aik waharuk.

⁷Nori aho, an nebe su suwe muluk hag deg lit nahwerabul wilibig laleman de, daroho di ale su ale elegma etma herarik lele.

⁸We mun yitmi-yatma etma darulug lelereg de, enggelangge elegma lei bini neg weregna etma bog leele,

⁹Sielu inim hol inim warik waharuk on anyo fam an nebe folo-folo aleroho neg nebe nalong baloho wereg ma hera dele.

¹⁰TUHAN nakni, it ap homi naselei on ai enenda nong-hong esakin, o kota kwe etma iren enolok fam-fam ale neg deheg, yeik-suahal eheg, neg durukmu esauk kahimu re, it enele matuk on etma re saling-kwaling esakin.

¹¹Nukoho hundig hup hundig de iren siag on neg deheg, o asingsingap kwelabeg ale neg deheg, dil noruk kamukoho, maseril norukmu esauk kahi.

¹²Di kwe su kwe re mundoho nong-hong eseheg; anggin on enobam feseheg, ne ap homi en di angge su angge onggo bal-bal atuk mu etmano enele seiale on eneg saha-faha eheg, duruk.

¹³It naselei on en an siahapdoho nobaharuk kalepman de, an nobam bong-bongdoho welale. Ne, it an na weim on en an mabenapdoho nobaharuk kalepman de, an de it airoho uruk en ulug herag-atuk kale.

¹⁴Famen de hat nare, namep, mun horogdoho ninim balereg lahe on anyo en at an nil oman napuk kahen.

¹⁵Endam de nit hat ninim nenenda sako fam mang-mangno duruk katuhuk, ne neneitogdoho re nenebe seberoho TUHAN obam wirigmu wene kabog-duruk katuhuk.

¹⁶It an naselei on etma re siag ale on it enobam olma inim, it enesahalimu inim wereg ma re, it ap homi an naselei on etma re enebe fetagdoho waratlug, enolukengge ap homi waratlug laukmu etma wamburuk kamag.

¹⁷Famen de an de Allah fam neg nele hwiruruk kahi, ne At TUHAN en neg an nahap wendat-napuk.

¹⁸Hup anggo inim nukoho inim, hundig ngururuk kwit oba yatuk kahimu, Aren an nele hol-napuk.

¹⁹It ap homi an naselei on etmano enebe esan lohwal halug an nowarukoho housalik waharukmu, Aren neg an nahap wendat-napuk.

²⁰It aire enobabut aham duk fug angge, Allah fam inim enakol bouk eleg angge en durukmu re, At Allah mundoho eitog wereg on anyo en an nele uruk kahi on anyo esanggo hol-napuk karuhu, ne ite enalong elehapdoho fesehu.

²¹Atam an nare deg latsi on en at ori enobam heroho bug uruk, aren de ele sali watsi ale anyo dahan debelug neg duruk.

²²Ele mag haukmu re we sako angge fam ap enda oho foruk, famen de endama re mun erim on foroho liren duruk. Ele urukmu re ele hape on eleg angge uruk, famen de fili enggat maho on en hagdoho enendama yuhulik lauk.

²³Ap homi bekitdoho neg duruk on de it enalong elehapdoho fesoukwag ulug fotog-esauk fug anggere, hiren di angge su angge fahet meneni yatdoho ebetuk kahep on ai At TUHAN fam neg og-utuk kamek. Ai fam de we Aren neg ahoroho fahat henusug laruhu.

²⁴Famen de nakni Allah, Haren neg de fologdoho it enebe koru ele yaron fam erahamu belabe fesein. It ap enele seiale uruk on mel ap amep belapuk on mel de, it enebe umur hoporoho welam fug angge we fomane hagdoho neg welatlug eleg amuhup. Famen an neg de Hat hobam nenda demdoho boruk kahi.