Read Ninia Yali MAZMUR 57 Bible Online

MAZMUR 57 - Ninia Yali bible

MAZMUR 57

¹ Ap homi en suni wilibi folug enebe ambine urukmu melal-enepuk on fahet, suni unggul unuk: Mun unggul waruk fug. Uruk on ai fene felaleg on. At Daud Asuni, at ebe Saul ahayeroho helep owikmu lebagdeg wereg lit ebag asuni.

²Nakni Allah henda neakin o, an de Hat hobam neg nalong baleg wereg lahimu re henda neakin. An nebe Hat hahwerabul apma heraho kweleg neg, sielu fun-fan hauk on anyo bale foruk.

³An den At Allah Mun Leho wereg on, At Allah an nobahet duruk on anyo fam hwiruruk kahi.

⁴Boholman Aren an onggo hweag-nereheg, nahap wendat nabeheg, duruk; it ap homi an nobam anggin fanggin nobaharuk on anyo re Aren neg enalong elehapdoho feseruk. At Allah en an nobam dipdoho neg napuk ale mel, ne hundig-handig enda neauk ale mel, unug nuruhu lit deg.

⁵An den it ap homi naselei on en hukdoho kwelap nusug, it enebe re no singa ap senggelduk on hag deg. Enaeg de inggisim inim dog angge inim hag deg, Enembilik anggen de karog aeg lebe-lebe maho on hag deg.

⁶Nakni Allah Hat mun handung-dang welahen on ai bohol fam etma ename feheg, Hambogbag welahen on ai kwenangma suma mundoho ename feheg din.

⁷It naselei on en de an yomaroho ulug sabu yepnapuk kwit de, an nahayeg wereg on anyo songgoap kwelabe nobaharuk. Iren de kwe laukmu etmano kwenang bohwe habuli foruk, famen de it enonggwareg at ilonggoma kobogdoho wamburuk.

⁸Nakni Allah an den Hat hobam nenda mun omamne fam demdoho boruk kahi, an den nenda mun hambukdoho Hat hobam neg demdoho boruk kahimu re, an den Hat mot-habeheg, suni hobahet eheg, duruk karuhuk.

⁹Nebe noluk su ketia holuk amin! nambinggong gambus, kecapi inim, an den o seleg dukwag ulug elelikohon de ketia henoluk amek!

¹⁰TUHAN nakni, an den it ap homi enunggul unuk-enunggul unuk on enesahalimu etman, Hat dang hapuk karuhuk. It ap homi humdoho enesahalimu etman, Hat hobahet suni motdeg suni eheg, duruk karuhuk.

¹¹Haren henda hundig nenepuk kahen ale aire mun humdeg lit bohol huli etma deg, ne dipdoho neg nenepuk kahen ale aire anggulog wereg huli etma deg.

¹²Nakni Allah, Hat hebe handung-dang welahen ale anyo bohol fam etma unuhuk feheg, ne Hambogbag welahen ale anyo o kwenangma mundoho etma ename feheg, din.